སྤྱི་འཐུས། 2025-2026

ལས་ཐོག་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་དབྱིན་ཡིག་གཙུག་ལག་རམས་བྱམས་པའི་ཐོག་སྦྱང་འབྲས་རྩེར་སོན་ཐོན། ཕྱི་ལོ་༢༠༡༣ ལོར་དབུས་བོད་ཀྱི་བུད་མེད་ལྷན་ཚོགས་སུ་བཙན་བྱོལ་བོད་ཀྱི་བུད་མེད་ཀྱི་ཁྲིམས་ལུགས་ནུས་སྟོབས་གོང་སྤེལ་ལས་གཞིའི་གཙོ་འགན་ཁུར་ཞིང་། རྗེས་སུ་དགུ་བཅུ་གསུམ་གྱི་ཚོགས་གཞོན་དང་ཚོགས་གཙོ་བཅས་རིམ་པས་གནང་། དེ་བཞིན་བོད། སོག་པོ། ཡུ་གུར། ཐེ་ཝན། ཧོང་ཀོང་བཅས་ལས་འདུས་པའི་ཞི་བདེ་རྒྱ་མཚོའི་རང་དབང་མཐུན་ཚོགས་ཀྱི་ཚོགས་གཞོན་གྱི་འགན་ཁུར་ཞུ་མུས་ཡིན། ཁོང་མོ་ནི་བོད་མི་མང་སྤྱི་འཐུས་ལྷན་ཚོགས་ཀྱི་ སྤྱི་འཐུས་རྒྱུན་ལས་དང་། མང་ཚོགས་རྩིས་ཁྲ་ཚོགས་ཆུང་། སྔོན་རྩིས་ཚོད་དཔག་འཆར་རྩིས་ཚོགས་ཆུང། སྤྱི་འཐུས་ལྷན་ཚོགས་ཀྱི་༧རྒྱལ་བའི་བཀའ་སློབ་དང་དམངས་གཙོའི་རྩོམ་སྒྲིག་ཚོགས་ཆུང་གི་འགན་འཁུར་ཐོག དུས་རྒྱུན་སྤྱི་འཐུས་ལྷན་ཚོགས་ཀྱི་གཞུང་འབྲེལ་སྐོར་བསྐྱོད་དང་རྒྱུན་ལྡན་གྱི་མང་ཚོགས་ལ་རྒྱུས་ལོན་ཉན་འཇོག གྲོས་ཚོགས་སུ་དུས་ནས་དུས་སུ་མང་ཚོགས་ཀྱི་མངོན་འདོད་དང་དོན་དངོས་གཙོ་བོར་གླེང་སློང་གནང་མཁན་ཞིག་ཡིན། སྤྱི་འཐུས་ལས་འགན་ཚགས་ཚུད་ཁུར་བཞིན་པའི་ཐོག བོད་དོན་འཐབ་རྩོད་སླད་རྒྱལ་ཁབ་ཕྱི་ནང་གི་ཚོགས་འདུ་དང་ལས་འགུལ་རིགས་མང་པོར་མཉམ་ཞུགས་གོ་སྒྲིག་གནང་མྱོང་ཞིང་། རྒྱ་གར་དང་རྒྱལ་སྤྱིའི་གསར་ལམ་ཁག་ཏུ་བོད་དོན་སྐོར་བགྲོ་གླེང་བཅར་འདྲི་རིམ་པར་གནང་མུས་སོགས། མདོར་ན། ལྷ་རྒྱ་རི་རྣམ་རྒྱལ་སྒྲོལ་དཀར་ནི་རང་ཚུགས་བརྟན་ཞིང་། དཀའ་ངལ་ལ་གདོང་གཏུག་ཕོད་པ་མ་ཟད། དུས་རྒྱུན་དགོས་མཁོ་ཅན་ཚོར་རོགས་ཕན་གང་ཐུབ་དང་། བོད་ཀྱི་རྩ་དོན་ཐད་ཁ་ཞེ་གཉིས་མེད་ཐོག་རང་འགན་ཁུར་དུ་ལེན་ཐུབ་པའི་གཞོན་སྐྱེས་བུད་མེད་འཇོན་ཐང་ཅན་ཞིག་ཡིན་པའི་ལོ་རྒྱུས་སྙིང་བསྡུས་སོ།། འོས་བསྡུའི་འབོད་ཚིག སྙིང་སྟོབས། གཞུང་དྲང་། མདུན་བསྐྱོད།