སྤྱི་འཐུས། 2025-2026

བསྟན་འཛིན་དབྱངས་འཛོམས་ལགས་ནི་དྷེ་ར་དྷཱུན་མངའ་སྡེ་ཧ་པ་པཱུར་བོད་མི་དང་ཟུར་གཞི་ཆགས་འདོད་རྒུ་གཡུ་རྒྱལ་གླིང་དུ་ཕྱི་ལོ་ ༡༩༨༤ ཟླ་ ༡༠ ཚེས་ ༡༩ ཉིན་འཁྲུངས། ཐོག་མར་པྰོནྚ་གཏན་སློབ་ནས་གཞི་རིམ་གྱི་སློབ་སྦྱོང་མཐར་སོན་རྗེས་ལྡི་ལི་མཐོ་སློབ་ཀྱི་ནང་གསེས་ (Shyama Prasad Mukherjee College) ཤྱམྰ་པྲཱ་སཱདྷ་མུཁྰེརྗི་རུ་དབྱིན་ཇིའི་སྐད་ཡིག་ཐོག་ཆེ་མཐོང་ཅན་གྱི་ཉེ་བའི་གཙུག་ལག་རབ་འབྱམས་པའི་བསླབ་པ་(B.A English Hon.) ཕྱི་ལོ་ ༢༠༠༤ ནས་ཕྱི་ལོ་ ༢༠༠༧ ལོར་མཐར་སོན།  མཐོ་སློབ་བསྐྱོད་སྐབས་ལྡི་ལི་རོ་ཧི་ནི་ས་གནས་གཞོན་ནུ་དང་བོད་རིགས་སློབ་ཕྲུག་ཚོགས་པའི་ཚོགས་གཞོན་གྱི་ལས་འགན་བསྐྱངས་ཤིང་། སྐབས་དེར་ལྡི་ལིའི་བོད་ཁྱིམ་སློབ་ཕྲུག་སྡོད་ཁང་ནས་བུད་མེད་རྩེ་ཕུད་ཀྱི་གཟེངས་རྟགས་ཀྱང་ཐོབ་ཡོད། ཕྱི་ལོ་ ༢༠༠༧ ལོར་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་སུ་བདམས་ཐོན་བྱུང་ནས་ཕྱི་ལོ་ ༢༠༡༠ བར་སྒྲིག་འཛུགས་འགན་འཛིན་གྱི་ལས་འགན་བསྒྲུབས། དེ་ནས་སླར་ཡང་དབུས་རྒྱུན་ལས་སུ་བདམས་ཐོན་བྱུང་ནས་ཕྱི་ལོ་ ༢༠༡༠ ནས་ཕྱི་ལོ་ ༢༠༡༣ བར་དྲིལ་བསྒྲགས་འགན་འཛིན་གྱི་ལས་འགན་བསྒྲུབས། བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་ཀྱི་ལས་ཡུན་ལོ་དྲུག་ལེགས་པར་གྲུབ་རྗེས་དབྱིན་ཡུལ་ (England) དུ་སློབ་གཉེར་གྱི་ཆེད་བསྐྱོད། དེར་(Plymouth University)གཙུག་ལག་སློབ་གཉེར་ཁང་དུ་འཛུལ་ཞུགས་ཀྱིས་ཕྱི་ལོ་ ༢༠༡༦ ནས་ཕྱི་ལོ་ ༢༠༡༧ བར་འཛིན་སྐྱོང་རབ་འབྱམས་པའི་(MSc. Management Studies) བསླབ་པ་མཐར་སོན་པ་བྱུང། དེ་རྗེས་སླར་ཡང་ (University of Sussex) སློབ་གཉེར་ཁང་དུ་ཕྱི་ལོ་ ༢༠༡༨ ནས་ཕྱི་ལོ་ ༢༠༡༩ བར་སྐྱེད་སྲིང་གྱི་གཙུག་ལག་རབ་འབྱམས་པའི་ (M.A. in Development Studies) བསླབ་པ་མཐར་སོན་ནས་དབྱིན་ཡུལ་དུ་གཙུག་ལག་རབ་འབྱམས་པའི་ཕྱག་འཁྱེར་གཉིས་ཐོབ། སློབ་གཉེར་དེ་དག་ལེགས་པར་གྲུབ་མཚམས་རྒྱ་གར་དུ་ཕྱིར་ལོག་གིས་སོ་ན་དྷ་བཀྲིས་གླིང་གཞིས་ཆགས་ཀྱི་ས་གནས་འགོ་འཛིན་གྱི་ཞབས་ཞུ་ལོ་གསུམ་རིང་བསྒྲུབས། ས་གནས་འགོ་འཛིན་ལས་ཡུན་སྐབས་ལས་འཆར་མང་དག་གི་ཆེད་དངུལ་གྱི་རོགས་བསྐྱོར་འཚོལ་སྒྲུབ་གང་ལེགས་བྱུང་ཡོད། ལྷག་པར་དེ་དུས་ཏོག་དབྱིབས་ནད་ཡམས་ཀྱི་སྐབས་ཁེལ་བ་དང་བསྟུན་ཛ་དྲག་གི་དུས་ཡུན་དེའི་རིང་གཞིས་ཆགས་ཀྱི་བོད་རིགས་རྣམས་ཀྱི་བདེ་དོན་གྱི་ཆེད་ལྷག་བསམ་ཞུམ་པ་མེད་པར་ཞབས་ཞུ་གང་ལེགས་བསྒྲུབས་ཐུབ་པ་བྱུང་ཡོད།