སྤྱི་འཐུས། 2025-2026

ཐའེ་ཝན་དོན་གཅོད་ཟུར་པ་བ་རི་ཟླ་བ་ཚེ་རིང་ལགས་བོད་མི་མང་སྤྱི་འཐུས་ཀྱི་འོས་བསྡུ་ཆེན་མོར་མཚམས་སྦྱོར་གྱི་ལོ་རྒྱུས་མདོར་བསྡུས། སྐུ་ངོ་བ་རི་ཟླ་བ་ཚེ་རིང་ལགས་ནི་ཁམས་སྒ་བར་སྐྱེས་ཤིང་། ཕྱི་ལོ་ ༡༩༩༢ ལོར་བོད་ནས་བཙན་བྱོལ་དུ་ཡོང་ཞིང་སྣེ་ལེན་ཁང་རིམ་པར་བརྒྱུད་དེ་བཞུགས་སྒར་རྡ་རམ་ས་ནས་ ༧གོང་ས་རྒྱལ་བ་རིན་པོ་ཆེ་མཆོག་གི་གསེར་ཞལ་དངོས་སུ་ཐོག་མ་མཇལ་བའི་སྐལ་བ་ལྡན་པ་སོགས་གསར་འབྱོར་བ་གཞན་དང་གཅིག་མཚུངས་སུ་གྲུབ། ཕྱི་ལོ་ ༡༩༩༣ ལོར་དབུས་བོད་མིའི་སྒྲིག་འཛུགས་ཀྱི་གཞུང་ཞབས་སུ་རྒྱུགས་སྤྲོད་ཀྱི་ལམ་ནས་ཞུགས་ཤིང་ཐོག་མ་བདེ་སྲུང་ཉམས་ཞིབ་ལས་ཁང་དུ་ཕྱག་ལས་གནང་། ཕྱི་ལོ་ ༡༩༩༥ ལོར་ཕྱི་དྲིལ་ལྷན་ཁང་གི་རྒྱ་རིགས་འབྲེལ་མཐུད་ཚན་པ་དང་། བོད་གནས་གསར་འཕྲིན་རྩོམ་སྒྲིག་པའི་ཕྱག་ལས་གཅིག་ལྕོགས་སུ་གནང་སྟེ་རྒྱ་ཡིག་གི་དུས་དེབ་བོད་ཀྱི་གསར་འཕྲིན་(Tibetan Bulletin)དང་རྒྱ་ཡིག་གི་དྲ་རྒྱ་བོད་ཀྱི་དྲ་ཤོག་(www.tibet.net)གསར་གཏོད་སོགས་བོད་རྒྱ་འབྲེལ་ལམ་གྱི་ལས་དོན་སྤེལ། ཕྱི་ལོ་ ༢༠༠༨ ནས་ ༢༠༢༡ བར་ཐའེ་ཝན་དུ་སྐུ་ཚབ་དོན་གཅོད་ཀྱི་མཛད་འགན་བཞེས་ཏེ་བོད་དོན་གྱི་དེབ་འགྲེམ་སྤེལ་ཆེད་གངས་ལྗོངས་དཔར་སྐྲུན་ཁང་གསར་འཛུགས་དང་། ཐའི་ཝན་བོད་རྒྱུད་ནང་ཆོས་མཐུན་ཚོགས་གསར་འཛུགས། ཁྲིམས་ཐོག་ནས་༧གོང་ས་མཆོག་དང་བོད་བརྒྱུད་ནང་ཆོས་ལ་མཚན་ཤས་བྱེད་མཁན་ཚོགས་ཁག་ཕམ་པར་བཏང་བ་སོགས་མི་ལོ་བཅུ་གསུམ་རིང་ལས་དོན་མཐའ་དག་གཟེངས་སུ་ཐོན་པ་བྱུང་བར། གཙོ་བོར་ཐའེ་ཝན་ནང་བཞུགས་བླ་སྤྲུལ་དགེ་འདུན་ལས་གྲུབ་པའི་བོད་བརྒྱུད་ནང་བསྟན་ཞིབ་འཇུག་ཚོགས་པས་སྐུ་ངོ་དོན་གཅོད་ལས་ཡུན་རྫོགས་སྐབས་དམིགས་བསལ་གཟིངས་སྟོད་ཕུལ་བའི་རྩ་ཚིག་ནང་བརྗོད་དོན། སྐུ་ཚབ་སྐུ་ངོ་དོན་གཅོད་ཟླ་བ་ཚེ་རིང་གང་ཉིད་ཀྱིས་༧གོང་ས་མཆོག་གི་བཀའ་དགོངས་དང་། དབུས་བོད་མིའི་སྒྲིག་འཛུགས་ཀྱི་བཀའ་བཞིན། ཐའེ་ཝན་དོན་གཅོད་ཀྱི་ཕྱག་ལས་གནང་བའི་མི་ལོ་བཅུ་གཉིས་ཀྱི་རིང་འདིར། ཕྱོགས་གང་ཅིའི་ཐད་ནས་ཕྱག་ལས་གཟེངས་ཐོན་གནང་བ་དང་། ༧གོང་ས་མཆོག་གི་དགོངས་གཞི་དང་མཛད་འཕྲིན། རང་གཞུང་གི་རྩ་དོན་དང་འབྲེལ་བའི་གནང་ཕྱོགས་སྤྱི་དང་། ཁྱད་པར་ཐའེ་ཝན་གྱི་རང་རེའི་ཆོས་ཚོགས་ཁག་དང་ཐའེ་སྡོད་བོད་རིགས་བར་གྱི་འབྲེལ་ལམ། བོད་བརྒྱུད་ནང་བསྟན་དང་༧གོང་ས་མཆོག་ལ་གཞི་མེད་སྐྱོན་འཛུགས་བྱེད་པའི་ཚོགས་པ་དང་མི་སྒེར་གྱི་བྱ་སྤྱོད་ལ་གདོང་ལེན་སོགས་གནང་སྒོ་ཁག་འཐུས་ཤོར་མེད་པར་མཛད་པ་ལྟར། གྲུབ་འབྲས་ཀྱང་གང་ལེགས་བྱུང་བར་གཟེངས་སྟོད་ཞུ་བཞིན་ཡོད། བོད་རྒྱལ་ལོ་༢༡༤༨ཆོ་འཕྲུལ་ཟླ་བ་༠༡ཚེས་༡༥་དགེ་བར། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་ཕུལ། ཞེས་གདེང་འཇོག་ཆེན་པོ་གནང་ཡོད། ཕྱི་ལོ་ ༢༠༢༢ ནས ༢༠༢༥ བར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གནང་། དེ་དང་མཉམ་དུ་སྐུ་ངོ་ལགས་ཕྱི་ལོ་༢༠༠༤ལོ་ནས་བོད་རྒྱ་ཞི་མོལ་ཚོགས་ཆུང་གི་ཚོགས་མིར་བསྐོ་བཞག་བསྩལ་བ་དང་། བཀའ་ཤག་སྐབས་༡༦པའི་སྐབས་སུ་བོད་རྒྱ་གཏན་འཇགས་ཐབས་ཇུས་ཚོགས་ཆུང་གི་ཚོགས་མི་ཡིན་པ་སོགས་མདོར་ན་ཁོང་གིས་མི་ལོ་ཧྲིལ་པོ་ ༣༢ རིང་དྲང་བདེན་དང་ལྷག་བསམ་ཟོལ་མེད་ཐོག་ལས་དོན་མཐའ་དག་ལེགས་གྲུབ་བྱུང་བ་དང་བསྟུན། ཉེ་ལམ་ཕ་ཡུལ་གཅིག་པ་དང་གྲོགས་པོ་ཁག་གཅིག་ནས་སྐུ་ངོ་ཟླ་བ་ཚེ་རིང་གཞུང་ཞབས་ནས་རྒན་གཡོལ་ཐོན་རུང་ཉམས་མྱོང་དང་ཤེས་རྒྱ་ཡོན་ཏན་ཡོད་པས་མུ་མཐུད་བསྟན་སྲིད་ཞབས་ཞུ་ཆེད་བོད་མི་མང་སྤྱི་འཐུས་ཀྱི་འོས་བསྡུ་ཆེན་མོའི་ནང་ཞུགས་དགོས་པ་འབོད་སྐུལ་ཞུས་བ་དང་ཡིག་ཆ་རིགས་བཀྲམ་པར། དེའི་སྐོར་སྐུ་ངོ་ཟླ་བ་ཚེ་རིང་ལགས་ལ་ཐད་ཀར་བཀའ་འདྲི་ཞུས་པར་ཁོང་གིས་ལོ་ན་དང་སྒྲིག་གཞིའི་རྐྱེན་པས་རྒན་གཡོལ་ལ་འགྲོ་བ་མ་གཏོགས་གཟུགས་ཁམས་གནས་བབ་དང་བོད་བསྟན་སྲིད་ལ་སེམས་ཤུགས་ནི་སྔར་བཞིན་ཡིན་པས་གོ་སྐབས་བྱུང་ན་སྤྱི་འཐུས་སམ་བོད་སྤྱི་པའི་ཞབས་ཞུའི་ལས་རིགས་གང་ཡིན་རུང་ཁྱད་པ་མེད་པར་གང་ནུས་ཅི་ཐུབ་ཞུ་འདོད་ཡོད་ཅེས་གསལ་བོ་གསུངས་པ་ལྟར་མདོ་ཁམས་ཡུལ་ཤུལ་ཚོགས་པ་དང་མདོ་སྟོད་མི་མང་ཡོངས་ལ་བ་རི་ཟླ་བ་ཚེ་རིང་མདོ་སྟོད་སྤྱི་འཐུས་སུ་རྒྱབ་སྐྱོར་ཡོང་བའི་རེ་འདུན་དང་བཅས་མདོ་ཁམས་ཡུལ་ཤུལ་ཚོགས་པའི་ཚོགས་གཙོ་གངས་ཕྲུག་བློ་བཟང་སོགས་ཀྱིས་ཕྱི་ལོ་༢༠༢༥ ལོ་ཟླ་ ༡༡ ཚེས་ ༣༡ ཉིན་ཐའེ་ཝན་ནས་ཕུལ། ཁོང་གིས་ལས་ཞོར་དུ་བྲིས་པའི་བརྩམས་ཆོས་སྐོར། ལས་ཞོར་དུ་ལོ་རབས་ལྔ་བཅུ་ནང་བོད་མིས་བཙན་རྒོལ་གྱི་ལོ་རྒྱུས་<ཟུངས་ཁྲག་གི་མཆོད་པ་>དང་ <བོད་ཀྱི་མི་འབོར་འཕེལ་འགྲིབ་ཀྱི་ལོ་རྒྱུས་ཀུན་གསལ་མེ་ལོང་།> རྩོམ་བྲིས་དང། Michael ཡིས་བརྩམས་པའི་ <བོད་ཀྱི་གནས་བབ > རྒྱ་སྒྱུར། རྩོམ་ཡིག་ཕྱོགས་སྒྲིག་གི་དེབ་<ང་ཡི་བླ་དང་རྨི་ལམ་འཁོར་སའི་ཕ་ཡུལ>། གཞན་ལས་རོགས་དང་མཉམ་དུ་<ལོ་ལྔ་བཅུ་རིང་གི་བཙན་བྱོལ་བོད་མའི་ལོ་རྒྱུས།> དང་། <བོད་ཀྱི་སྲུང་མ་དང་ལྷ་འདྲེའི་སྐོར།> <བོད་དང་ཐའེ་ཝན་མཉམ་སྐྱོད་ཀྱི་ལོ་༢༠།>སོགས་རྩོམ་སྒྲིག་བྱས། དེ་མིན་ད་རུང་བོད་དོན་སྐོར་གྱི་རྩོམ་ཡིག་བཅུ་ཕྲག་ལྷག་སྤེལ་མྱོང་ཡོད་པ་བཅས་སོ།། གསལ་བཤད། གོང་གསལ་ལོ་རྒྱུས་ཁག་ནི་ཟླ་བ་༡༡་ཚེས་༣༠་ཉིན་སྒ་བ་སྐུ་སྲུང་དཀུན་དགའ་དང་སྐུ་ངོ་ཟླ་བ་ཚེ་རིང་གཉིས་ལ་མདོ་ཁམས་ཡུལ་ཤུལ་ཚོགས་པ་ནས་གཟིངས་རྟགས་ཕུལ་སྐབས་ཀྱི་ངོ་སྤྲོད་ལོ་རྒྱུས་དང་། <བོད་ཀྱི་མི་འབོར་འཕེལ་འགྲིབ་ཀྱི་ལོ་རྒྱུས་ཀུན་གསལ་མེ་ལོང་།>དེབ་ཀྱི་རྩོམ་པ་པོའི་ངོ་སྤྲོད། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་དམིགས་གསལ་གཟིངས་སྟོད་ཕུལ་བའི་རྩ་ཚིག་སོགས་གཞིར་བཟུང་ཕྱོགས་བསྒྲིགས་དང་སྐུ་ངོ་ཟླ་བ་ཚེ་རིང་ལགས་ནས་གཟིགས་ཏེ་ནོར་འཁྲུལ་རིགས་མེད་པ་ངོས་འཛིན་གནང་ཡོད།