སྤྱི་འཐུས། 2025-2026

༄༅། །རྡོ་རིང་བསྟན་འཛིན་ཕུན་ཚོགས་ནི་ ༡༩༩༤ ལོར་བོད་ནས་འབྱོར་རྗེས་མ་སུ་རི་བོད་ཁྱིམ་དུ་སློབ་འཇུག་ཞུས།  ༢༠༠༥ ལོར་སློབ་གྲྭའི་སྤྱི་ཁྱབ་རྒན་བདག་གི་འགན་ཁུར་ཞུས།  ༢༠༠༧ ལོར་མ་རྡ་ར་སི་བོད་ཕྲུག་ཚོགས་པའི་རྒྱུན་ལས་དང་། ༢༠༠༨ ལོར་ཚོགས་གཙོ་དང་རྒྱ་གར་རྒྱལ་ཡོངས་བོད་རིགས་མཐོ་སློབ་སྒེར་ལངས་ཀྱི་གོ་སྒྲིག་ཚོགས་ཆུང་གི་རྒྱུན་ལས་བྱས།  ༢༠༠༩ ལོར་བོད་རིགས་མཐོ་རིམ་སློབ་མའི་ཚོགས་ཆེན་སྐབས་ ༣ པའི་སྤྱི་ཁྱབ་འབྲེལ་མཐུད་པ།  ༢༠༡༢ ལོར་མ་རྡ་ར་སི་བོད་ཕྲུག་ཚོགས་པའི་ཚོགས་གཙོ་དང་རྒྱལ་ཡོངས་མང་གཙོ་ཚོགས་པའི་དབུས་རྒྱུན་བྱས།  ༢༠༡༣ ལོར་མ་རྡ་ར་སི་ཡི་ཤུའི་མཐོ་སློབ་ནང་བོད་དོན་ཉམས་ཞིབ་པ་ཀོ་ལོ་ཌི་ཨར་ཕི་གདན་ཞུས་ཀྱིས་བོད་དོན་གླེང་བ་ཐེངས་དང་པོ་ཆགས་ཡོད།  ༢༠༡༤ ལོར་རྒྱ་རིགས་དང་ཕྱི་རྒྱལ་སློབ་ཕྲུག་ཡོད་པའི་རྒྱ་གར་མཐོ་སློབ་ཏུ་བོད་རིགས་དང་བོད་དོན་ངོ་སྤྲོད།  ༢༠༡༤ ལོར་རྒྱལ་ཡོངས་མང་གཙོ་ཚོགས་པའི་དབུས་རྒྱུན་དང་དྲུང་ཆེའི་འགན་འཁུར་ཞུས།  གཞན་ཡང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་ནང་ཉམས་ཞིབ་ལས་རོགས་དང་། བོད་ཀྱི་ལྟ་ཞིབ་ཅེས་པའི་ནང་ཨིན་ཡིག་ཉམས་ཞིབ་པ་བྱས།  ༢༠༡༨ ནས་ ༢༠༢༠ བར་ཁོན་སི་ལན་ཌི་ནང་བོད་དོན་དང་འབྲེལ་བའི་ལས་འགུལ་དང་།  ཡུ་གུར་དང་བོད་རིགས་དང་ཧོང་ཀོང་དང་ཝི་རྡི་ནམ་མཉམ་དུ་བོད་དོན་ལས་འགུལ་གང་མང་སྤེལ་ཐུབ་པ་བྱུང་།  ༢༠༡༩ ལོར་ཁོན་སི་ལན་ཌི་བོད་རིགས་མཐུན་ཚོགས་ཀྱི་རྒྱུན་ལས་དང་ཚོགས་གཙོར་འེས་འདེམས་བྱུང་།  ༢༠༢༠ ལོར་ཨོ་གླིང་ནང་གི་རྒྱ་གཞུང་ལ་རྒོལ་བའི་ཚོགས་པ་མང་གཙོ་སྲུང་སྐྱོབ་གསར་འཛུགས་དང་སྟངས་འཛིན་ཚོགས་ཆུང་གི་ཚོགས་མི་བྱས། ཕྱི་ལོ་ ༢༠༢༡ ལོར་སྐབས་ ༡༧ པའི་སྤྱི་འཐུས་སུ་འོས་འདེམས་ཀྱིས་ལོ་བཞི་ལྷག་རིང་སྤྱི་འཐུས་ཀྱི་ལས་ཁུར་ཞུ་བཞིན་པ་དང་། གྲོས་ཚོགས་སྐབས་ཁྲིམས་དོན་དང་གནད་དོན་གལ་ཆེའི་རིགས་ཐད་བགྲོ་གླེང་དང་་མཉམ་བཞུགས་ཧུར་བརྩོན་ངང་ལེན་ཡོང་པ་དང་། བོད་དོན་ལས་འགུལ་ཐད་ཨོ་གླིང་དང་། ཉི་ཧོང་། དེ་བཞིན་ནིའུ་ཛི་ལན་ཌི་བཅས་སུ་ཚོགས་འདུའི་ནང་བགྲོ་གླེང་དང་། ཨོ་གླིང་རྒྱལ་ནང་དུ་དབུས་དང་མང་སྡེའི་གྲོས་ཚོགས་འཐུས་མི་མང་དག་མཇལ་འཕྲད་ཀྱིས་བོད་དོན་ཐད་ཞུ་གཏུགས་དང་གླེང་མོལ་ཐེངས་མང་བྱས་པ་མཟད། ཨོ་གླིང་གྲོང་འཁྱེར་བྷིར་སི་བྷིན་གྱི་འཐུས་མིའི་གྲོས་ཚོགས་ནང་བོད་དང་བོད་མིའི་སྐོར་གཏམ་བཤད་བྱེད་མཁན་ཐོག་མ་དེ་ཆགས་ཡོད་པ་བཅས་ཀྱི་ལོ་རྒྱུས་སྙིང་བསྡུས་སུ།