སྤྱི་འཐུས། 2025-2026

ཤེས་ཡོན་དང་བོད་ཀྱི་གནས་དོན་དང་འབྲེལ་བའི་ཆབ་སྲིད་ཀྱི་བྱེད་སྒོ་ཇེ་སྤེལ་གྱི་ཉམས་མྱོང་སྙིང་བསྡུས། ➤ ལོ་ན་ཆུང་བའི་དུས་སུ་(Pestalozzi Kinderdorf, Trogen)བུ་ཕྲུག་གསོ་སྐྱོང་ཁང་དུ་བསྡད་པ་ཡིན། ➤ ཕྱི་ལོ་ ༡༩༨༢ ནས་༡༩༨༣  ལོ་གཅིག་རིང་ལ་དྭགས་ཁུལ་དུ་གནས་སྡོད་བོད་ཀྱི་ཕྲུ་གུའི་ཁྱིམ་སྡེར་རམ་འདེགས་ཞུས་ཆེད་དུ་སུད་སི་ཊོ་གེན་ཁོངས་ཀྱི་ན་གཞོན་ཚོ་དང་མཉམ་དུ་དཔལ་འབྱོར་འདུ་འགོད་ཀྱི་ལས་དོན་དྭང་བླངས་ཐོག་ཞུ་རྒྱུའི་གོ་སྐལ་བཟང་པོར་ཐོབ།། ➤ ཕྱི་ལོ་ ༡༩༨༥ ལོར་སློབ་གྲྭ་ཆེ་བ་ཐོན་ནས་(Universität Zurich)ཛུ་རིག་མཐོ་སློབ་ལ་འཛུལ་ཞུགས་བྱས། དེ་ནས་སྤྱི་ཚོགས་རིགས་གནས་དང་ཚོང་དོན། རྒྱལ་རབ་སྐོར་ལ་སློབ་མཐར་ཕྱིན། སྤྱི་ལོ་ ༢༠༠༡ ལོར་བསླབ་པ་མཐར་སོན་གྱི་རྩོམ་ཡིག་སྟེ་བཙན་བྱོལ་ནང་གི་བོད་ཀྱི་མཐོ་རིམ་མི་སྣའི་ཆབ་སྲིད་ཀྱི་དབང་ཆ་དང་འགོ་ཁྲིད་ལ་ཇི་ལྟར་གསར་བརྗེས་ཀྱི་འཕོ་འགྱུར་འགྲོ་བཞིན་པ་ཞེས་པའི་ཕྱག་དེབ་ཅིག་རི་ཀོན་དུ་འགྲེམས་སྤེལ་བྱས།  ➤ ཕྱི་ལོ་ ༡༩༨༧ ནས་ ༡༩༨༩ བར་ཡོ་རོབ་བོད་རིགས་གཞོན་ནུ་མཐུན་ཚོགས་ཀྱི་ཚོགས་གཙོའི་ལས་འགན་དང་། སྐབས་དེར་ང་ཚོ་ན་གཞོན་བཞིས་མཉམ་དུ་ཡོ་རོབ་ཀྱི་གྲོང་ཁྱེར་ཁག་གི་གྲོང་སྡེའི་ཚོགས་ཁང་དུ་བོད་མིའི་ཐུན་མོང་མ་ཡིན་པའི་གཞས་དང་ཞབས་བྲོ་བཅས་ངོ་སྤྲོད་ཐུབ་པ་དེར་མི་ཚོས་གདེང་འཇོག་དང་དགའ་བསུ་ཐུབ་ཡོད། ➤ ཕྱི་ལོ་ ༡༩༨༧ ནས ༡༩༩༤ བར་ཡོ་རོབ་བོད་རིགས་གཞོན་ནུ་མཐུན་ཚོགས་ཀྱི་གསར་འཕྲིན་ཏེ་ བོད་ཀྱི་ན་གཞོན་གྱི་རྩོམ་བྲིས་ཀྱི་འགན་འཁུར་ཞུས་ཤིང་། གསར་འཕྲིན་དེ་ནི་བོད་སྐད་དང་འཇར་མན་གྱི་སྐད་ནང་འགྲེམ་སྤེལ་ཞུས་ཡོད། ➤ ཕྱི་ལོ་ ༡༩༨༩ ལོར་ཨེ་ཤི་ཡའི་རང་དབང་རླུང་འཕྲིན་གྱི་འགོ་འཛིན་དང་ལས་འཆར་རྩོམ་འབྲིའི་ལས་འགན་བསྒྲུབས་ཤིང་སྐབས་དེར་བོད་དོན་ལས་འགུལ་ཆེད་སློབ་ཕྲུག་ཚོགས་པ་གཙུགས་མཁན་ཐོགས་མའི་གྲས་སུ་ཡོད། ➤ ཕྱི་ལོ་ ༡༩༩༧ ནས་ ༡༩༩༩ བར་མངའ་སྡེ་ཛུ་རིག་ནང་གི་(Green Party) ལྗང་ཁུ་ཆབ་སྲིད་ཚོགས་པའི་དྲུང་ཆེ་དང་མགྲིན་ཚབ་པ་གཅིག་ལྕོགས་ཀྱི་འགན་ཁུར་ཞུས། ➤ ཕྱི་ལོ་ ༢༠༠༠ ནས་ ༢༠༠༥ བར་སུད་སི་ནང་དུ་ཡོད་པའི་ (Greenpeace) ཁོར་ཡུག་སྲུང་སྐྱོབ་ཚོགས་པའི་མགྲིན་ཚབ་པའི་ལས་དོན་བསྒྲུབས།  ➤ ཕྱི་ལོ་ ༢༠༠༢ ནས་ ༢༠༠༤ བར་སུད་བོད་མཐུན་གྲོགས་ཚོགས་པའི་ཚོགས་གཙོ་དང་རྒྱུན་ལས་བྱས་ཤིང་། གཞི་རྐང་སུད་བོད་མཐུན་ཚོགས་ཀྱི་ལས་དོན་ཚགས་ཚུད་དང་། དུས་བསྟུན་མདུན་བསྐྱོད་ཡར་ཐོན་ཡོང་བ་སོགས་བཅོས་བསྒྱུར་གྱི་ཐབས་ལམ་གསར་གཏོད་བྱས་ཏེ་དངོས་སུ་ལག་བསྟར་ཐུབ་པ་བྱུང་ཡོད། ➤ ཕྱི་ལོ་ ༢༠༠༣ ནས་ ༢༠༠༥ བར་འཇར་མན་འཛམ་གླིང་བོད་དོན་རྒྱབ་སྐྱོར་ཚོགས་པའི་རྒྱུན་ལས་བྱས་པ་མ་ཟད།  སྐབས་དེའི་བོད་མིའི་རྒྱུན་ལས་གཅིག་པུ་ཡིན་ཡང་ཚོགས་པའི་ལས་དོན་ཐག་གཅོད་ཅི་རིགས་ལ་མཉམ་ཞུགས་དང་རང་ཉིད་ཀྱིས་ཤེས་ཡོན་དང་ནུས་ཤུགས་ཡོད་ཚད་བཏོན་ནས་ལས་དོན་འཐུས་ཤོར་མི་འགྲོ་བའི་སླད་འགན་འཁུར་གང་ལེགས་ཞུས་ཡོད། ➤ ཕྱི་ལོ་ ༢༠༠༤ ནས་ ༢༠༠༧ བར་སུད་བོད་མཛའ་འབྲེལ་ཚོགས་པའི་ཚོགས་གཙོའི་འགན་ཁུར་ཞུ་ཞོར་དུ། འཛམ་གླིང་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་རྒྱུན་ལས་དང་། བོད་ཀྱི་རྩེད་འགྲན་གྱི་ལས་དོན་ཚོགས་ཆུང་གི་འགོ་འཛིན་དང་། ༢༠༠༨ ལོའི་པེ་ཅིང་དུ་འཛམ་གླིང་རྩེད་འགྲན་སྐབས་ཀྱི་བོད་དོན་ལས་འགུལ་ཚགས་ཚུད་ཡོང་སླད་ལམ་སྟོན་ཞུས་ཤིང་།  ཚོགས་པ་ཁག་ལ་འབྲེལ་མཐུད་དང་ལས་དོན་འཆར་བཀོད་ཀྱི་ལས་འགན་སོགས་ཞུས་ཡོད།   ➤ ཕྱི་ལོ་ ༢༠༠༧ ལོར་གྲོང་ཁྱེར་སྦུ་རུ་སེལ་དུ་ཚོགས་པའི་བོད་དོན་ལས་འགུལ་ཆེན་མོ་གོ་བསྒྲིགས་ཀྱི་གཙོ་འགན་ཁུར་ཡོད། ➤ ཕྱི་ལོ་ ༢༠༠༦ ནས་ ༢༠༠༨ བར་བོད་ཀྱི་རྩེད་མོའི་འགྲན་བསྡུར་རུ་ཁག་གི་ཚོགས་གཙོ་དང་རྒྱུན་ལས་བྱས་ཤིང་། ལོ་གཉིས་རིང་ལྷག་བསམ་རྣམ་དག་གི་སྒོ་ནས་འབད་བརྩོན་ཧུར་ཐག་ཞུས་ཡོད། སྐབས་དེར་ལས་དོན་མང་པོ་ཞིག་གི་འགོ་འཛུགས་ཞུ་མིའི་གྲས་དང་ལྷག་དོན་དུ་པེ་ཅིང་ལ་བོད་ཀྱི་ངོ་བོ་མཚོན་པའི་ངོ་རྒོལ་ཞིག་བྱས་ཡོད་པ་མ་ཟད། སུད་སི་གྲོང་ཁྱེར་ལོ་སན་ཁུལ་དུ་ཡང་འཛམ་གླིང་རྒྱལ་སྤྱིའི་རྩེད་མོའི་ལྷན་ཁང་གི་གནད་ཡོད་མི་སྣ་ཁག་དང་འབྲེལ་ལམ་བརྒྱུད་བཀའ་མོལ་ཞུས་ཤིང་། ཞུ་གཏུགས་དང་དེ་མིན་ཡོ་རོབ་ཀྱི་གྲོས་ཚོགས་སོགས་སུའང་བོད་ཀྱི་འཐུས་ཚབ་ཀྱི་ངོ་བོ་ཐོག་ནས་བོད་དོན་བདེན་མཐའ་སེལ་རྒྱུ་དང་བོད་ཀྱི་གནད་དོན་ངེས་པར་ཏུ་ཐག་གཅོད་གནང་རྒྱུར་མཐུན་འགྱུར་ཡོང་བའི་འབོད་སྐུལ་ཞུས་ཡོད། ➤ ཕྱི་ལོ་ ༢༠༠༧ ནས་ ༢༠༡༤ བར་ཆབ་སྲིད་ལས་འགུལ་སྤེལ་ཕྱོགས་སྐོར་གྱི་ཚོང་གཉེར་ཁང་ (Kampagnenforum GmbH) ལ་སློབ་སྟོན་པ་རྒན་པའི་ལས་ཀ་བྱས། ➤ ཕྱི་ལོ་ ༢༠༠༨ ནས་བཟུང་བོད་དོན་དྭང་བླངས་ལས་འགན་འཁུར་བྱས་ཞོར་དུ། བོད་ཀྱི་སྐོར་གློག་བརྙན་བརྒྱུད་གསར་བསྒྲགས་དང་། དེ་སླད་དཔལ་འབྱོར་འདུས་འགོད་དང་། རང་རིགས་བོད་མི་བཙོན་དུ་བཅུག་པའི་སྐུ་ཞབས་དོན་གྲུབ་དབང་ཆེན་ལགས་དང་། སྐུ་ཞབས་འགོ་ལོག་འཇིགས་མེད་ལགས་གཙོས་པའི་བོད་ཀྱི་ཆབ་སྲིད་བཙོན་པ་རྣམས་རྒྱ་གཞུང་གི་བཙོན་གྲོལ་ཡོང་སླད་དུ་རྒྱལ་སྤྱི་ཉེས་ཡངས་ཚོགས་པ་དང་གསར་འགོད་པའི་སྲུང་སྐྱོབ་ཚོགས་པ་ལ་ཞུ་གཏུགས་སོགས་ཀྱི་ལས་དོན་བསྒྲུབས་ཡོད། ➤ ཕྱི་ལོ་ ༢༠༠༨ ལོར་བོད་ཀྱི་གློག་བརྙན་དུས་སྟོན་ཐོགས་མ་འགོ་འཛུགས་བྱས།  ➤ ཕྱི་ལོ་ ༢༠༡༣ ནས་ ༢༠༡༥ བར་བོད་མི་མང་སྤྱི་འཐུས་སྐབས་བཅོ་ལྔ་པའི་ཡུ་རོབ་བོད་མིའི་སྤྱི་འཐུས་བྱས་ཞོར་དུ་བཀྲས་མཐོང་དྲིལ་བསྒྲགས་ཁང་གི་འགན་མཛིན་དང་སྦྱིན་བདག་བྱས། ➤ ཕྱི་ལོ་ ༢༠༡༩ ནས་ ༢༠༢༡ བར། ཛུ་རིག་སློབ་གྲྭ་ཆེན་མོའི་ལོ་རྒྱུས་ཀྱི་སློབ་ཁྲིད་ལག་འཁྱེར་ཐོབ་ཅིང་སྐབས་དེར་སུད་སིའི་རོགས་སྐྱོར་ཚོགས་པ། (SWISSAID) ནང་ལ་གསར་འགོད་དང་ཆབ་སྲིད་ལས་འགུལ་དོ་དམ་པ་གཅིག་ལྕོགས་ཀྱི་ལས་ཀ་བྱས། ཞོར་དུ་མ་འོངས་པའི་བོད་ཅེས་པའི་ལས་འགུལ་གསར་པ་ཞིག་གསར་གཏོད་བྱས་ཡོད།  ➤ ཕྱི་ལོ་ ༢༠༢༠ ལོའི་འཇར་མན་བོད་དོན་ལས་འགུལ་ཁང་གི་ (Tibet Initiative Deutschland) སློབ་སྟོན་པའི་གྲས་སུ་ཡོད་རིང་བོད་ཀྱི་རྒྱལ་རབ་དང་། ཆབ་སྲིད། ཁོར་ཡུག་སོགས་ཀྱི་སྐོར་ལ་རྩོམ་ཡིག་འགྲེམས་སྤེལ་ཡང་བྱས་མྱོང་ཡོད། ➤ ཕྱི་ལོ་ ༢༠༢༢ ནས་ ༢༠༢༣ བར་བོད་ཀྱིི་མ་འོངས་མདུན་ལམ་ཞེས་པའི་ཚོགས་འདུ་དང་གྲོས་གླེང་ཐེངས་༥ གོ་སྒྲིག་ཞུས་ཡོད། ➤ ཕྱི་ལོ་ ༢༠༢༡ ནས་ད་ལྟ་བར་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གྱི་ལས་འགན་ཞུ་བཞིན་མཆིས།