Godruk Kalsang Phuntsok
འོས་ཁུངས།
ལྷོ་བྱང་ཨ་རི།
ད་ལྟའི་ལས་གནས།
དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཟུར། Former President, Tibetan Youth Congress
འོས་བསྡུའི་ལོ།
2025-2026
སྐབས།
18
ད་ལྟའི་སྡོད་གནས།
པོརཊ་ལེནཊ། Portland
ཕ་ཡུལ།
དིང་རི། Dhingri
བོད་ལ་དུས་འགྱུར་བྱུང་བའི་རྗེས་བལ་ཡུལ་ཤར་ཁུམ་དུ་གནས་ སྡོད་བྱས། ངའི་ཕ་མས་བུ་ཕྲུག་ཚོ་གསོ་སྐྱོང་སོགས་ཀྱི་དཀའ་ངལ་ཤིན་ཏུ་ཆེ་བའི་སྐབས་དེར། ྋགོང་ས་མཆོག་ལ་ཕུལ་བ་ཡིན་གསུངས་ཏེ་རྒྱ་གར་རྡ་རམ་ས་ལར་ཕུལ་བཞག་པའི་བོད་ཕྲུག་ཉམ་ཐག་རང་ལོ་ ༣ ལོན་པ་དེ་སྒོ་དྲུག་སྐལ་བཟང་ཕུན་ཚོགས་ཡིན། ྋགོང་ས་མཆོག་དང་བཙན་བྱོལ་བོད་གཞུང་གི་བཀྲིན་ལ་བརྟེན་ནས་པན་ཇབ་གཙུག་ལག་སློབ་གྲྭ་ཆེན་པོ་ནས་དཔལ་འབྱོར་རིག་པའི་སློབ་སྦྱོང་རིག་གཅིག་རྐང་འཛིན་ (M.A. Economics) དང་། ཧ་རི་ཡ་ན་གཙུག་ལག་སློབ་གྲྭ་ཆེན་མོ་ནས་ཆེ་ཐོའི་ (Post Graduate Studies in Management) མཐར་སོན་བྱུང༌། ༢༠༠༡ ནས་ ༢༠༠༧ བར་ལོ་ངོ་དྲུག་རིང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོའི་འགན་འཁུར་ཞུས། ༢༠༠༡ ལོར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོར་འདེམས་ཐོན་གྱིས་ཚོགས་གཙོའི་ཐོག་མའི་གཏམ་བཤད་ནང་༼མི་ལོ་ ༣༠ སྔོན་རང་གི་མི་ཚེའི་གནས་སྟངས་ཤིན་ཏུ་ཉམ་ཐག་པའི་སྐབས་ྋགོང་ས་མཆོག་ལ་ཕུལ་བའི་ཕྲུ་གུ་དེ། ད་ཆ་འདབ་གཤོག་གཉིས་ལྡན། ཤེས་ཡོན་དང་ལྷག་བསམ་གྱི་ཕོངས་པ་མེད་པ། བོད་རྒྱལ་ཁབ་དང་མི་རིགས་ཀྱི་རང་དབང་སླར་གསོའི་ཆེད་ལེགས་སྐྱེས་འབུལ་རྒྱུའི་དམ་བཅའ་བརྟན་པོ་ཡོད་པ་རང་ཉིད་ད་ལམ་བོད་རྒྱལ་ཁབ་དང་བོད་མི་རིགས་ལ་སླར་ཡང་ཕུལ་བ་ཡིན།༽ ཞེས་ཚོགས་ཆེན་སྟེང་དམ་བཅའ་ཕུལ་ཡོད། ད་བར་རང་ཉིད་དལ་སྡོད་སྐྱིད་འདོད་ཀྱི་སྣང་བ་སྤངས་ཏེ་གོ་སྐབས་ནམ་བྱུང་བོད་མི་རིགས་ཀྱི་རང་དབང་ལ་འབད་མུས་ཡིན། དེང་འཛམ་གླིང་གང་སར་རང་དབང་འཐབ་རྩོད་ཀྱི་སྒྲོན་མེ་ཁྱབ་བཞིན་པ་དང༌། རྒྱལ་ཁབ་མང་པོས་རྒྱ་ནག་དམར་པོའི་གཞུང་ཐོག་འཛིན་པའི་སྲིད་བྱུས་ལ་འགྱུར་བ་བཏང་དང་གཏོང་བཞིན་པའི་སྐབས་དང་གཅིག བོད་རྒྱལ་ཁབ་དང་མི་རིགས་ཆགས་འཇིགས་ཀྱི་གནས་སྟངས་དང་། བཙན་བྱོལ་བོད་མིའི་གནས་སྟངས་ཛ་དྲག་གི་གནས་སུ་ཡོད་པ་བཅས་ལ་བསམ་གཞིགས་ནན་པོ་བྱས་འབྲས་ཀྱིས། ཤིན་ཏུ་ གལ་ཆེ་དོན་ཆེར་ད་ལམ་སྒོ་དྲུག་སྐལ་བཟང་ཕུན་ཚོགས་རང་ཉིད་ ༢༠༢༦ སྐབས་ ༡༨ པའི་བྱང་ཨ་རིའི་སྤྱི་འཐུས་འོས་མིར་ཞུགས་རྒྱུ་ཡིན། ➤ ༡༩༩༨ ནས་ ༢༠༠༤ བར་ཀཋ་མན་གྲུ་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོའི་ལས་འཁུར་ཞུས་རིང་དོལ་རྒྱལ་རྗེས་འབྲངས་པ་ང་བླ་མ་ཟེར་བ་བལ་ཡུལ་དུ་སླེབས་སྐབས་རང་ཉིད་ས་གཞོན་ཚོགས་གཙོའི་མིང་ཐོག་ཁོ་པ་ཡོད་སའི་མགྲོན་ཁང་དེར་བསྐྱོད་ནས་ཁོ་པར་ད་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུ་རྒྱུ་མཚམས་འཇོག་དགོས་པ་དང། རྒྱའི་རྒྱུག་ཁྱི་བྱེད་ཀྱི་ཡོད་ན་བོད་མིའི་ཁེ་ཕན་ལེན་མཚམས་འཇོག་དགོས་པའི་ཁ་གཏད་དང་གདོང་ལེན་བྱས། ➤ ༢༠༠༡ ནས་ ༢༠༠༤ བར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོའི་ལས་འཁུར་ཞུས། ➤ ༢༠༠༤ ནས་ ༢༠༠༧ བར་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོར་བསྐྱར་དུ་དྲག་འདེམས་བྱུང། ➤ མཉམ་འབྲེལ་རྒྱལ་ཚོགས་ཀྱི་ཚོགས་ཆེན་དུ་མཉམ་ཞུགས་ཐོག་བོད་དོན་གཏམ་བཤད་དང། རྒྱལ་ཚོགས་ནས་གོ་སྒྲིག་བྱས་པའི་ཚོགས་འདུ་ཁག་ཏུ་མཉམ་ཞུགས་ཀྱིས་བོད་དོན་ལས་འགུལ་སྤེལ། ➤ རྒྱལ་སྤྱིའི་གཞོན་ནུའི་ནང་པའི་མཐུན་ཚོགས་ཀྱི་ཚོགས་མི་དང་ཚོགས་འདུར་མཉམ་ཞུགས་ཀྱིས་རྒྱ་གཞུང་གིས་བོད་ནང་གི་ཆོས་དད་རང་དབང་ལ་རྩིས་མེད་རྡོག་རོལ་བཏང་བའི་གནས་སྟངས་སོགས་འགྲེལ་བརྗོད་ཀྱིས་རྒྱབ་སྐྱོར་ཐོབ་ཐབས་བྱས། ➤ ༢༠༠༣ གནས་མཆོག་རྡོ་རྗེ་གདན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༢༨ བཀྲིན་སྩལ་སྐབས་བོད་ཀྱི་གཞོན་ནུ་ལྷན་ཚོགས་སུ་དུས་དབང་གི་སྦྱིན་བདག་བྱེད་རྒྱུའི་གོ་སྐལ་བཟང་པོ་སྩལ་ཐོབ་བྱུང་བས་དུས་དབང་གོ་སྒྲིག་ཚོགས་ཆུང་གི་ཚོགས་མི་དང་གོ་སྒྲིག་ཞུ་རྒྱུའི་ཉམས་མྱོང་། ➤ ༢༠༠༤ ལོར་ནིའུ་ཡོག་རྒྱལ་སྤྱིའི་མཉམ་འབྲེལ་རྒྱལ་ཚོགས་མདུན་ཉིན་གྲངས་ ༣༢ རིང་དུས་ཚོད་ངེས་མེད་ཀྱི་ཟས་བཅད་ལས་འགུལ་གོ་སྒྲིག་ཞུས་པ་དང། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཀོ་ཕི་ཨ་ནན་མཆོག་ནས་བཀོད་མངགས་བཞིན་རྒྱལ་ཚོགས་ཀྱི་དྲུང་ཆེ་ལས་ཚབ་ཀེ་རོ་ལིན་མེག་ཨེ་སི་ཀི་མཆོག་རྒྱལ་གཅེས་ཟས་བཅད་ལས་འགུལ་བའི་སར་ཕེབས་ནས་ཟས་བཅད་ལས་འགུལ་མཚམས་འཇོག་ཡོང་བ་དང། རྒྱལ་ཚོགས་ནས་ལས་འགུལ་བའི་དགོས་འདུན་ལ་ཞལ་བཞེས་ཡིག་ཐོག་ནས་གནང་བ་དང། ཡང་ཇི་ནི་ཝར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་མཆོག་ནས་ཀྱང་ལས་འགུལ་བའི་དགོས་འདུན་ཁག་ལ་ངོས་ལེན་ཞུ་རྒྱུའི་ཕྱག་བྲིས་གནང་ཡོད། ➤ ༢༠༠༥ ལོར་ཨི་ཀྲ་ལིའི་རྒྱལ་ས་ཀྲུ་རིན་དུ་རྒྱལ་སྤྱིའི་དགུན་དུས་ཨོ་ལོམ་པིག་རྩེད་འགྲན་སྐབས་ཆབ་སྲིད་བཙོན་ཟུར་སྐུ་ཞབས་དཔལ་ལྡན་རྒྱ་མཚོ་ལགས་ཀྱིས་གཙོས་བོད་མི་གསུམ་ནས་ཟས་བཅད་ལས་འགུལ་ཞུས་འབྲས། རྒྱལ་སྤྱིའི་རྩེད་འགྲན་གྱི་ཚོགས་གཙོའི་ལས་ཁུངས་ནས་དགོས་འདུན་ཁག་ལ་ངོས་བཞེས་ཀྱིས་གསུང་འཕྲིན་དང། ཡོ་རོབ་རྩེད་འགྲན་གྱི་ཚོགས་གཙོ། ཨི་ཀྲ་ལིའི་རྩེད་འགྲན་ཀྱི་ཚོགས་གཙོ། རྒྱལ་སྤྱིའི་རྩེད་འགྲན་གྱི་སྐུ་ཚབ་བཅས་ཟས་བཅད་ལས་འགུལ་བའི་སར་གདུང་སེམས་མཉམ་སྐྱེད་ཆེད་དངོས་སུ་ཕེབས་ཐུབ་པ་བྱུང་ཡོད། ➤ ལོ་རྒྱུས་རང་བཞིན་གྱི་ལས་འགུལ་རྒྱ་གར་མི་མང་གཉིད་བསད་ལས་འགུལ Bharat Jagran Yatra ཞེས་རྒྱ་གར་རྒྱལ་ཡོངས་སུ་རྒྱ་གར་མི་མང་གིས་བོད་དོན་ཐོག་རྒྱབ་སྐྱོར་ཐོབ་ཆེད་རྒྱ་བལ་འབྲུག་གསུམ་གྱི་ས་གནས་གཞོན་ལྷན་ཆ་བགོས་ཀྱིས་ཉིན་གྲངས་ ༣༥ རིང་རྒྱ་གར་རྒྱལ་ཡོངས་སུ་བོད་དོན་དྲིལ་བསྒྲགས་རྒྱ་ཆེ་སྤེལ་ཐུབ་པ་བྱུང་ཡོད། ལས་འགུལ་དེའི་རིང་རྒྱ་གར་གྱི་གྲོང་འཁྱེར་ཆེ་བ་ ༥༠ དང་གྲངས་ལས་འདས་པའི་གྲོང་གསེབ་དང་རྒྱ་གར་མི་མང་འབུམ་ཚོ་མང་པོར་འབྲེལ་མཐུད་ཀྱིས་བོད་དོན་བདེན་རྒྱབ་རྒྱ་ཆེ་ཐོབ་པ་བྱུང༌། ➤ རྒྱ་བལ་འབྲུག་གསུམ་གྱིས་གཙོས་བྱང་ཨ་རི་དང་ཡོ་རོབ་བཅས་སུ་བོད་མི་གནས་སྡོད་ཕལ་མོ་ཆེར་ངོ་བཅར་གྱིས་མང་ཚོགས་དང་འབྲེལ་བ་དམ་ཟབ་ཞུས། དབུ་མའི་ལམ་གྱི་སྲིད་བྱུས་ཇི་བཞིན་གོ་དོན་རྟོགས་པར་མ་ཟད། གྲོས་ཚོགས་ཀྱི་ལས་དོན་བྱ་ཕྱོགས་དང། ཁྲིམས་སྒྲིག གྲོས་ཚོགས་ཀྱི་འཛིན་པའི་སྲིད་བྱུས་བཅས་ལ་རྒྱུས་མངའ་ཡོད། རང་དབང་དང་རང་བཙན་རྩོད་བཞིན་པའི་མི་རིགས་པེ་ལི་སི་ཊན་དང། ཤར་ཏུར་ཀི་སི་ཐན། ཤར་ཏི་མུར། འབར་མ་བཅས་ཀྱི་ལྷན་ཚོགས་དང་ལས་འགུལ་མཉམ་སྤེལ་གྱི་ཉམས་མྱོང་དང། ལྷག་པར་མཉམ་འབྲེལ་རྒྱལ་ཚོགས་ཀྱི་གོ་སྒྲིག་འོག་ཆིག་སྒྲིལ་རང་བཞིན་གྱི་བརྒྱུད་ལམ་ (Solidarity Network) ནས་རང་དབང་དང་རང་བཙན་རྩོད་མཁན་གྱི་མི་རིགས་ཚོའི་ཚོགས་འདུར་མཉམ་ཞུགས་ཞུས། ➤ བོད་ཀྱི་གཞོན་ནུ་ལྷན་ཚོགས་འཛམ་གླིང་སྤྱི་ཚོགས་གཞོན་ནུའི་མཐུན་ཚོགས་ (International Union of Socialist Youth) ཀྱི་ཚོགས་མི་ཡིན་པ་དང༌། རྒྱལ་ཁབ་ ༡༠༦ སྐུ་ཚབ་མཚོན་པའི་ལྷན་ཚོགས་ནས་གོ་སྒྲིག་ཞུས་པའི་ཚོགས་ཆེན་དང་ལས་འགུལ་ཁག་ལ་མཉམ་ཞུགས་ཀྱིས་བོད་དོན་གྲོས་ཆོད་བཞག་ཐུབ་པ་བྱུང། ➤ འབར་མ་དམངས་གཙོ་དང་རང་དབང་འཐབ་རྩོད་དང་འབྲེལ་ལམ་ཤིན་ཏུ་ཆེ་བ་མ་ཟད། གཞོན་ལྷན་སྐབས་འབར་མའི་ལས་འགུལ་ལ་མཐུན་འགྱུར་དང་ཚོགས་འདུ་ཁག་གོ་སྒྲིག་ཞུས། ''National Endowment for Democracy” ཡིས་བོད་མིའི་རང་དབང་དང་དམངས་གཙོ་ཡར་རྒྱས་ཆེད་དཔལ་འབྱོར་གྱི་མཐུན་འགྱུར་ཞུ་ཐུབ་པ་བྱུང་ཡོད། དབུས་གཞོན་ལྷན་གཙོས་རྒྱ་བལ་འབྲུག་གསུམ་དུ་ཡོད་པའི་ས་གཞོན་ ༤༥ ཙམ་ལ་ལས་ཁུངས་ནང་གི་དངོས་ཆས་ཉོ་སྒྲུབ་དང། ས་གནས་སོ་སོར་ཟབ་སྦྱོང་གོ་སྒྲིག་ཆེད་རོགས་དངུལ་ལོ་ངོ་གསུམ་རིང་ཐོབ་ཐུབ་པ་བྱུང། ➤ རྒྱ་ནག་གི་འགོ་གཙོ་ཧུ་ཅིན་ཐའུས་གཙོས་རྒྱ་ནག་གི་དཔོན་རིགས་བདུན་སི་པན་རྒྱལ་ཁབ་ཀྱི་ཁྲིམས་ཁང་ (Spanish Court) དུ་ཞུ་གཏུགས་ཀྱིས་མཐར་རྒྱ་ནག་གི་དཔོན་རིགས་ཚོར་བོད་ནང་མི་རིགས་རྩ་གཏོར་གཏོང་བའི་ངན་བྱུས་ལག་བསྟར་བྱས་པར་ཁྲིམས་འགལ་ཉེས་ཚད་ཕོག་པ་དང། རྒྱ་རིགས་དཔོན་པོ་དེ་དག་སི་པན་རྒྱལ་ཁབ་ཏུ་སླེབས་ཚེ་འཛིན་བཟུང་བྱེད་རྒྱུ་མ་ཟད། རྒྱལ་ཁབ་གཞན་ཁག་ནས་སི་པན་གཞུང་དང་ནག་ཅན་རྩིས་སྤྲོད་བྱེད་རྒྱུའི་ཁྲིམས་འཆར་ལ་མོས་མཐུན་བྱེད་པ་ཚོས་ཀྱང་རྒྱ་རིགས་དཔོན་པོ་དེ་དག་འཛིན་བཟུང་གིས་སི་པན་གཞུང་ལ་རྩིས་སྤྲོད་བྱེད་རྒྱུའི་ཁྲིམས་ཐག་བཅད་ཡོད་པས་རྒྱལ་ཁ་ཐོབ་པ་བྱུང་ཡོད། རང་ཉིད་གཞོན་ལྷན་ཚོགས་གཙོའི་ངོ་བོའི་ཐོག་ནས་རྒྱ་ནག་དཔོན་རིགས་དེ་དག་ནས་བོད་ནང་མི་རིགས་རྩ་གཏོར་གཏོང་རྒྱུར་ཁྲིམས་འགལ་བྱས་ཡོད་པར་བོད་མིའི་ཆབ་སྲིད་བཙོན་ཟུར་ཚོའི་ཞུ་སྦྱོར་བ་དང་དཔང་རྟགས་ཡིན་པའི་མིང་རྟགས་བརྒྱབ་ཡོད། བོད་མིའི་ངོས་ནས་ཆབ་སྲིད་བཙོན་ཟུར་སྟག་སྣ་འཇིགས་མེད་བཟང་པོ་ལགས། ཆབ་སྲིད་བཙོན་ཟུར་དཔལ་ལྡན་རྒྱ་མཚོ་ལགས། གཞོན་ལྷན་ཚོགས་གཙོ་སྒོ་དྲུག་སྐལ་བཟང་ཕུན་ཚོགས། སྤྱི་འཐུས་སྐུ་ཞབས་དབང་ཆེན་ལགས་བཅས་ནས་མཚན་རྟགས་འཁོད་པའི་ཡིག་ཆ་ཤོག་སྒམ་བཞི་ཁྲིམས་ཁང་དུ་ཕུལ་ཐུབ་པ་བྱུང་ཡོད། ➤ བོད་རྒྱལ་ཡོངས་རྩེད་རིགས་ཚོགས་པ་ "Tibetan National Football Association" ཀྱི་འཛིན་སྐྱོང་ལྷན་ཚོགས་ཀྱི་ཚོགས་མི་ཡིན་པའི་ངོས་ནས་བོད་ཀྱི་རྐད་རྩེད་རུ་ཁག་གི་རྒྱ་གར་དང་བལ་ཡུལ་བོད་མིའི་གཞིས་སྒར་ཁག་ཏུ་རྩེད་འགྲན་ཆེད་མཐུན་འགྱུར་ཆ་ཚང་བོད་ཀྱི་གཞོན་ནུ་ལྷན་ཚོགས་ནས་ཞུས། ➤ རྒྱལ་སྤྱིའི་ནང་པའི་གཞོན་ནུའི་མཐུན་ཚོགས་ཀྱི་ཚོགས་མི་ཡིན་པའི་ངོས་ནས་རྒྱལ་སྤྱིའི་ཚོགས་འདུར་ངོ་བཅར་དང་། ཡིག་ཆ་གསར་སྐྲུན་སོགས་རྒྱ་ཆེ་ཞུས། ➤ ཝཱ་ཎ་བོད་ཀྱི་གཙུག་ལག་སློབ་ཁང་དུ་རྒྱལ་སྤྱིའི་ནང་པའི་གཞོན་ནུ་མཐུན་ཚོགས་ཀྱི་ས་གནས་ཡན་ལག་གསར་འཛུགས་ཞུས། དེ་ནི་འཛམ་གླིང་ནང་བོད་ཀྱི་ནང་པའི་གཞོན་ནུའི་ས་གནས་ཡན་ལག་ཐོག་མ་དེ་ཡིན་པ་དང། མཐུན་ཚོགས་དེས་རྒྱལ་སྤྱིའི་གཞོན་ནུའི་ནང་པའི་མཐུན་ཚོགས་ཀྱི་ཚོགས་འདུར་ཚོགས་བཅར་དང། བཙན་བྱོལ་དུ་ཡོད་པའི་བོད་རིགས་གཞོན་སྐྱེས་ཚོའི་ཁྲོད་ནང་ཆོས་གོ་རྟོགས་དང། བགྲོ་གླེང་གོ་སྒྲིག་ཞུ་མུས་རེད། མིའི་སྤྱི་ཚོགས་ཁྲོད་ནང་ཆོས་ངོ་སྤྲོད་ཀྱི་ལས་འགུལ་ཐོག་མ་གཞོན་ལྷན་ནས་གསར་གཏོང་ཞུས། དེ་ནི་བོད་རྒྱ་གར་དང་བལ་ཡུལ་གྱི་མཐོ་སློབ་ཁག་ཏུ་ཡོད་པའི་བོད་པའི་གཞོན་སྐྱེས་ཚོ་མ་འོངས་བོད་མིའི་འགོ་ཁྲིད་འབྱུང་ཐབས་སུ་ལོ་ལྟར་བོད་ཀྱི་གཞོན་ནུའི་འགོ་ཁྲིད་འོས་སྦྱོང་གསར་གཏོད་ཞུས། ཉིན་ལྔའི་འོས་སྦྱོང་སྐབས་བོད་ཀྱི་རྒྱལ་རབས་ལོ་རྒྱུས། ནང་ཆོས་ངོ་སྤྲོད། བཙན་བྱོལ་བོད་མིའི་དམངས་གཙོའི་ལམ་ལུགས། རྒྱལ་སྤྱིའི་གནས་སྟངས། བཙན་བྱོལ་བོད་མིའི་གནས་སྟངས། བོད་དང་རྒྱ་ནག་གི་གནས་སྟངས་སོགས་ཀྱི་ཐད་ཡོངས་གྲགས་ཀྱི་རྒྱལ་སྤྱིའི་མཁས་དབང་ཁག་གདན་ཞུས་ཀྱིས་གཞོན་ལྷན་ནས་ད་ལྟའང་གཏན་འབེབས་ལས་འགུལ་དུ་འགོ་ཁྲིད་འོས་སྦྱོང་གནང་བཞིན་ཡོད། ➤ བྱང་ཨ་རིའི་ས་གནས་གཞོན་ནུའི་ལོ་འཁོར་ཚོགས་ཆེན་གསར་གཏོང་ཞུས། བྱང་ཨ་རི་ཁུལ་དུ་ཡོད་པའི་ས་གཞོན་དབར་འབྲེལ་ལམ་དམ་ཟབ་དང་ལས་འགུལ་མཉམ་སྤེལ་འབྱུང་ཐབས་གཞོན་སྐྱེས་རྣམས་ལ་གཞོན་ལྷན་གྱི་ལྟ་གྲུབ་དང་ལས་དོན་བྱ་ཕྱོགས་ཐད་གྲུབ་འབྲས་ཆེན་པོ་བྱུང་ཡོད། ➤ ཐེ་ཝན་ནང་ལོ་མང་རིང་འབད་བརྩོན་བྱས་མཐར། ༢༠༠༢ ལོར་དཀལ་ངལ་ལ་མ་ལྟོས་པར་རང་ཉིད་གཞོན་ལྷན་ཚོགས་གཙོ་ཡིན་པའི་སྐབས་ས་གནས་སུ་ངོ་བཅར་གྱིས་ཐེ་ཝན་ས་གནས་གཞོན་ནུ་གསར་འཛུགས་ཞུས། ➤ སྦེལ་ཇེམ་ས་གནས་གཞོན་ནུ་གསར་འཛུགས་ཞུས། ཡོ་རོབ་ནང་བོད་ཀྱི་གཞོན་ནུ་ལྷན་ཚོགས་ཀྱི་ས་གནས་ཐོག་མ་དེ་ཡིན། ད་བར་ཡོ་རོབ་ས་གནས་གང་སར་ས་གནས་གཞོན་ལྷན་ཡོད་མུས་གནས། ➤ ༢༠༠༣ ལོར་གཞོན་ལྷན་གྱིས་གཏན་འབེབས་མཛད་པ་ལྟར། གཞུང་འབྲེལ་དང་ལྷན་ཚོགས་ཀྱི་ལས་དོན་ཆེ་ཁག་སྐབས་གཞོན་ལྷན་ཚོགས་མི་ཡོངས་ནས་ངེས་པར་དུ་བོད་ཆས་ཕྱུ་པ་ལྕགས་མདོག་གྱོན་དགོས་པ་གསར་གཏོད་བྱས། ➤ བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་བཞི་དང་ཚོགས་ཆེན་ཐེངས་གཉིས་གོ་སྒྲིག་ཞུས། ➤ ༢༠༠༧ ལོར་བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་བོད་མིའི་འཐབ་རྩོད་དང་བོད་ཀྱི་ལོ་རྒྱུས་ལ་འགན་འཁུར་ཡོད་པའི་ངོས་འཛིན་དང་ཆོད་སེམས་བརྟན་པོས་འདས་པའི་ལོ་རྒྱུས་སྤྱི་དང། ལྷག་དོན་དུས་རབས་ཕྱེད་ཀ་མ་ཟིན་ཙམ་གྱི་རང་རེའི་བཙན་བྱོལ་གྱི་ལོ་རྒྱུས་ནང་གི་འཐབ་རྩོད་ཀྱི་ལས་དོན་ལ་བསྐྱར་ཞིབ་དང། འཐབ་རྩོད་ཀྱི་ཉམས་མྱོང་ཕྱོགས་བསྡོམས་བྱས་ཏེ་གོ་སྐབས་རང་བཞིན་གྱི་དེང་གི་རྒྱལ་སྤྱིའི་ཆབ་སྲིད་ཀྱི་ཁོར་ཡུག་ནང་བོད་དོན་བདེན་པའི་འཐབ་རྩོད་དེ་གནས་ཚད་མཐོ་ལ་གྲུབ་འབྲས་ལྡན་པའི་ཕྱོགས་སུ་སྟོབས་ཤུགས་ཆེན་པོས་བསྐྱོད་ཐུབ་པ་དམིགས་ཚད་དུ་བཟུང་ནས་མི་མང་གི་ལས་འགུལ་མདུན་སྐྱོད་ཆེན་མོ་ཞེས་དོན་དང་དགོས་པ་ཆེན་པོ་ཡོད་པ་ཞིག་སྤེལ་སྐབས་རྒྱ་བལ་འབྲུག་གསུམ་ནས་བོད་མི་མང་ཚོགས་ཉིས་ཁྲི་ལྔ་སྟོང་ལྷག་རྒྱ་གར་རྒྱལ་ས་ལྡི་ལིར་འདུ་འཛོམས་ཀྱིས་འཚེ་མེད་ཞི་བའི་ལོ་རྒྱུས་རང་བཞིན་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་ཐུབ་པ་བྱུང། སྤྱིར་ལས་འགུལ་འདི་ནི་རྒྱུན་སྲོལ་ལྟར་འཛམ་གླིང་མཉམ་འབྲེལ་རྒྱལ་ཚོགས་དང་། རང་དབང་རྒྱལ་ཁབ་ཁག་ལ་འབོད་སྐུལ་དང་དགོས་འདུན་སྟོན་པ་ལྟ་བུ་མ་ཡིན་པར་རྒྱ་ནག་དམར་གཞུང་ལ་གནོན་ཤུགས་དྲག་པོ་སྤྲད་པ་དང། རྒྱ་ནག་དབང་འཛིན་པ་ཚོས་བོད་ཀྱི་གནད་དོན་ལ་བསམས་གཞིགས་མི་བྱེད་ཐབས་མེད་བཟོ་ཐུབ་པ་བྱེད་རྒྱུར་ ༢༠༠༧ ཟླ་ ༦ ཚེས་ ༢༦ ནས་ཟླ་ ༨ ཚེས་ ༧ བར་རྒྱ་ནག་དམར་གཞུང་ནས་དགོས་འདུན་ཁག་ལ་ཁུངས་འཕེར་ལན་འདེབས་དགོས་པའི་སྙན་ཞུ་འབུལ་བ་དང། ཡང་ཕྱི་ཟླ་ ༧ ཟླ་མགོ་ནས་གཞོན་ལྷན་སྤྱི་ཁྱབ་དབུས་རྒྱུན་ལས་ཁང་གིས་འགན་འཁུར་ཐོག་གཞོན་ནུའི་དགོས་འདུན་ཁག་ལྔ་ལ་ཁུངས་འཕེར་ལན་འདེབས་གསལ་བཤད་དགོས་སླད་ལྡི་ལིར་བོད་མི་སྐྱ་སེར་ཕོ་མོ་ ༡༤ ནས་ཉིན་གྲངས་ ༣༣ རིང་དུས་ཚོད་ངེས་མེད་ཀྱི་ཟས་བཅད་ལས་འགུལ་སྤེལ་བ་དང། ཕྱི་ཟླ་ ༨ ཚེས་ ༨ ཉིན་ལྡི་ལིར་རྒྱ་བལ་འབྲུག་གསུམ་ནས་བོད་མི་སྐྱ་སེར་ཕོ་མོ་རྒན་གཞོན་ཉིས་ཁྲི་ལྔ་སྟོང་ལྷག་འདུ་འཛོམས་ཀྱིས་ལོ་རྒྱུས་རང་བཞིན་གྱི་མི་མང་གི་ལས་འགུལ་མདུན་སྐྱོད་ཆེན་མོ་དེ་བཞིན་རྒྱ་གར་གཞུང་ལ་ཆོག་མཆན་ཞུས་པ་བཞིན་བཀའ་ཁྲོལ་གྱིས་ཐོག་ནས་རྒྱ་གར་གྲོས་ཚོགས་ཀྱི་གཞུང་ལམ་ཆེན་མོར་དངོས་སུ་སྤེལ་ཐུབ་པ་བྱུང་ཡང། ལས་འགུལ་གོ་སྒྲིག་བྱེད་མཁན་གྱི་ངོས་ནས་མི་མང་གི་ལས་འགུལ་མདུན་སྐྱོད་ཆེན་མོ་འདི་བཞིན་ཐོག་མཐའ་བར་གསུམ་དུ་བདེན་པ་དང་འཚེ་བ་མེད་པའི་ཐབས་ལམ་འབའ་ཞིག་ལ་གཞི་བཅོལ་དགོས་པའི་ངོ་སྤྲོད་སྣེ་ཁྲིད་བྱས་ཀྱང། ལས་འགུལ་ནང་ཞུགས་པའི་མི་མང་གི་ཁྲོད་ནས་རང་ལུས་མེར་བསྲེགས་གཏོང་ཐབས་བྱེད་པ་སོགས་འཚེ་བའི་རང་བཞིན་གྱི་ལས་དོན་ལག་བསྟར་བྱས་པ་སོགས་ལ་བརྟེན་ནས་རྒྱ་གར་དབུས་གཞུང་དང་ལྡི་ལི་ས་གནས་གཞུང་གིས་བློས་འགན་མ་བཟོད་པའི་ངོས་འཛིན་འོག་མི་མང་གི་ལས་འགུལ་འཕྲལ་དུ་མཚམས་འཇོག་བྱེད་དགོས་པའི་དགོས་འདུན་བཏོན་པ་དང། ཡང་ཕྱི་ལོ་ ༢༠༠༧ ཟླ་ ༨ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྦུག་དམ་སྦྱར་མའི་གསུང་འཕྲིན་སྩལ་བའི་ནང་ ༼༄༅། །ལྷག་བསམ་དང་སྙིང་སྟོབས་གཡོ་བ་མེད་པའི་ལྡི་ལིར་ཟས་བཅད་ངོ་རྒོལ་དུ་ཡོད་པའི་བོད་རིགས་བཅུ་བཞི་དང། ལས་འགུལ་གོ་སྒྲིག་པ་ཐུན་མོང་ལ། ཆེད་དོན། ཁྱེད་ཅག་གི་སངས་རྒྱས་ཀྱི་བསྟན་པ་རིན་པོ་ཆེ་དང་ཟུང་དུ་འབྲེལ་བའི་བོད་ཀྱི་རྩ་དོན་སླད་ཞུམ་པ་མེད་པའི་ལྷག་བསམ་སྙིང་སྟོབས་བརྟན་པོས་བློ་སྤོབས་སྐྱེ་བའི་གནས་སུ་གྱུར་མོད། བྱེད་ཐབས་འདི་རིགས་རང་སྲོག་རང་གིས་གཅོད་པའི་འཚེ་བའི་རང་བཞིན་ཡིན་པར་མ་ཟད། ད་ལྟའི་ཕྱི་ནང་གི་གནས་བབ་ལ་གཞིགས་ན་བོད་རིགས་མང་པོས་རང་སྲོག་བཏང་ཡང་དེ་མཐུན་གྱི་གྲུབ་འབྲས་ཐོན་རེ་མ་མངོན་ཞིང། དེ་བས་རྩ་ཆེའི་མི་ལུས་ཆུད་ཟོས་མི་གཏོང་བར་ལྷག་བསམ་སྙིང་སྟོབས་མི་རབས་ནས་མི་རབས་རྒྱུན་འཁྱོངས་ཡོང་བའི་བགྱི་སྒོ་སྤེལ་ཐབས་བྱེད་རྒྱུ་མི་རིགས་ཀྱི་ཞབས་འདེགས་ལ་སྨན་རླབས་ཆེ་བར་མངོན། ཁྱེད་ཚོས་ད་བར་གྱི་རང་སྲོག་བློས་གཏོང་དཀའ་སྤྱད་ལས་འགུལ་འདིས་བོད་ཕྱི་ནང་དང། རྒྱལ་སྤྱིའི་ནང་དྲིལ་བསྒྲགས་དང་མང་ཚོགས་སེམས་འགུལ་ཐེབས་ངེས་བྱུང་བས་དམིགས་དོན་གང་ཆེ་གྲུབ་ཟིན་པ་བཅས། དེས་ན་ད་ཆ་ཟས་བཅད་ལས་འགུལ་འཕྲལ་དུ་མཚམས་འཇོག་ཡོང་བའི་རེ་བསྐུལ་ནན་པོ་བྱེད་ཀྱི་ཡོད་ན་དེ་དོན་བསམ་གཞིགས་དང་ལེན་ཡོད་པ་དང། སྤྱི་དོན་སླད་ལྷག་བསམ་བཟང་པོའི་དཀའ་བ་སྤྱད་པའི་དགེ་བའི་རྩ་བ་རྣམས་ཀུན་ཏུ་བཟང་པོའི་སྨོན་ལམ་གྱི་བསྔོ་སྨོན་བགྱིད་རྒྱུ་བཅས་དེ་དོན་ཡིད་འཇགས་འཚལ། ཆོས་སྨྲ་བ། ཤཱཀྱའི་དགེ་སློང་ཏཱ་ལའི་བླ་མ་བསྟན་འཛིན་རྒྱ་མཚོས་ ༢༠༠༧ ཕྱི་ཟླ་ ༨ ཚེས་ ༧ ལ།།༽ ཞེས་བཀའ་ཡིག་སྩལ་སོན་དང། ཡང་ཕྱི་ཟླ་ ༧ ཚེས་ ༢༢ ཉིན་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་བཀའ་ཤག་གི་གསུང་འཕྲིན་སྩལ་བའི་ནང། ༼རིགས་ཞེན་ལྷག་བསམ་དང། སྙིང་སྟོབས་མཚུངས་ཟླ་མ་མཆིས་པ་ཟས་བཅད་ལས་འགུལ་དུ་བཞུགས་མཁན་རྣམ་པ་ལྷན་རྒྱས་མཆོག་གི་སྙན་དྲུང་དུ། ཆེད་ཞུ། ད་ཆ་རྣམ་པ་ལྷན་རྒྱས་ཀྱི་རླབས་ཆེའི་ལས་འགུལ་ལ་བརྟེན་ནས་རྒྱལ་སྤྱིའི་ནང་དྲིལ་བསྒྲགས་དང། སེམས་འགུལ་སྤེལ་ཤུགས་གང་ཆེ་བྱུང་ཟིན་པའི་སྐབས་འདིར་རྣམ་པ་ལྷན་རྒྱས་ནས་དགོངས་པ་ཆེ་བཞེས་ཀྱིས་ལུས་སྲོག་ལ་ཉེན་ཁ་མ་བཟོས་པར་ཟས་བཅད་ལས་འགུལ་འཕྲལ་དུ་མཚམས་འཇོག་ཡོང་བའི་རེ་བསྐུལ་ཤུགས་ཆེ་ནན་པོ་ཞུ་རྒྱུ་དེ་ལུགས་དགོངས་བཞེས་ཅིད་ནས་ཡོང་བ་རྣམ་མངའ་ཞུ།༽ ཡང་ཕྱི་ཟླ་ ༧ ཚེས་ ༢༡ ཉིན་བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་གིས་གཙོས་ཆོལ་གསུམ་ཆོས་ལུགས་དང་བཅས་པའི་ངོ་ཚབ་མཚོན་པའི་སྤྱི་འཐུས་ཐུབ་བསྟན་འཕེལ་རྒྱས་ལགས་དང། རྒྱལ་རོང་ཟླ་བ་ཚེ་རིང་ལགས། སྐལ་བཟང་རྒྱལ་མཚན་ལགས་བཅས་བོད་མི་རྒྱལ་གཅེས་པ་ཟམ་བཅད་པ་རྣམས་ལ་གུས་འདུད་འཚམས་འདྲི་གནང་བ་དང། ཁོང་ཚོའི་སྙིང་སྟོབས་དང་ཆོད་སེམས་ལྷག་བསམ་བཅས་ལ་ཆེ་བསྟོད་ཀྱི་གསུང་བཤད་གནང་ཡོད་པ་མ་ཟད། བཙོན་བྱོལ་བོད་གཞུང་གིས་བཅའ་ཁྲིམས་ཀྱི་རྒྱ་ལས་མ་འདས་པའི་ཐོག་ནས་ལས་འགུལ་འདིའི་ཐོག་མཐུན་འགྱུར་དང་རོགས་རམ་གང་ཞིག་དགོས་ཀྱང་དེ་ལྟར་གནང་རྒྱུ་ཡིན་པའི་ཞལ་བཞེས་གནང་ཡོད། མདོར་ན་ལས་འགུལ་མདུན་སྐྱོད་ཆེན་མོའི་དགོས་འདུན་ཡོངས་རྫོགས་རྒྱ་ནག་གཞུང་ནས་ཁུངས་འཕེར་ལན་འདེབས་དགོས་པ་ཆགས་ཀྱི་ཡོད་སྟབས་གཞོན་ལྷན་ནས་སྐབས་དེར་སྐུའི་གཅེན་པོ་སྐུ་ངོ་རྒྱ་ལོ་དོན་གྲུབ་མཆོག་གདན་ཞུས་ཀྱིས་ཕྱི་ཟླ་ ༨ ཚེས་ ༡ ཉིན་སྐུ་ངོ་རྒྱ་ལོ་དོན་གྲུབ་མཆོག་རྒྱ་ནག་གཞུང་ཚབ་ཁང་དུ་གདན་འབོད་ཀྱིས་དེར་ཆེད་ཕེབས་གནང་སྟེ་ཆུ་ཚོད་ ༢།༣༠ རིང་གཞོན་ནུའི་དགོས་འདུན་ཁག་གི་ཐོག་ལ་ལྡི་ལིར་བཅའ་སྡོད་རྒྱ་ནག་གཞུང་ཚབ་ཆེན་མོ་དང། འབྲེལ་ཡོད་ཆེས་མཐོའི་དཔོན་རིགས་བཞི་དང་མཉམ་དུ་གླེང་སློང་ཤུགས་ཆེན་གནང་ཐུབ་པ་དང། རྒྱ་ནག་གཞུང་ཚབ་ཀྱི་ངོས་ནས་ཟད་བཅད་ལས་འགུལ་བ་རྣམས་ཀྱི་དགོས་འདུན་ཁག་ལ་དགོངས་བཞེས་ཀྱིས་དགོས་འདུན་ནང་ཡོད་པ་བཞིན་༸པཎ་ཆེན་ཆུང་སྲིད་རིན་པོའི་ཆེ་སྐུ་འཚོ་བཞུགས་ཡོད་པའི་གནས་ཚུལ་གསལ་བཤད་དང། ཡང་རྗེས་སུ་བོད་རང་སྐྱོང་ལྗོངས་ཀྱི་ཀྲུ་ཞི་གཞོན་པས་ཕྱི་རྒྱལ་དང་རྒྱ་ནག་གི་གསར་འགོད་པར་པཎ་ཆེན་དགེ་འདུན་ཆོས་ཀྱི་ཉི་མ་ད་ཆ་བོད་ས་ཁུལ་འབྲིང་རིམ་གྱི་སློབ་གྲྭ་ཞིག་ཏུ་ཡོད་པ་དང། ཁོང་གི་སྐུ་སྤུན་སྲས་མོ་ཁ་ཤས་མཐོ་སློབ་ཁག་ཏུ་ཡོད་ལ། འགའ་ཤས་ཀྱི་ཕྱག་ལས་གནང་བཞིན་ཡོད་པ་སོགས་གསལ་འདོན་བྱས་པའི་གནས་ཚུལ་ནི་ད་བར་༸པཎ་ཆེན་རིན་པོ་ཆེའི་སྐོར་གྱི་གནས་ཚུལ་གསལ་ཤོས་དེ་ཡིན་པ་འབྲེལ་ཡོད་གསར་ལས་ཁང་མང་པོས་ངོས་འཛིན་བྱས་ཡོད། ལྷག་པར་རྒྱ་ནག་གཞུང་ཚབ་ནས་བོད་ཀྱི་དངོས་ཡོད་གནས་སྟངས་བོད་མི་རང་ཉིད་ནས་དངོས་སུ་མཐོང་ཚོར་དང་ཤེས་རྟོགས་ཐུབ་ངེས་ཀྱི་ལས་རིམ་ཞིག་དགོས་པ་ངོ་བཞེས་ཐུབ་པ་བྱུང་ཡོད། ཐེངས་དེའི་ལས་འགུལ་ནི་རྒྱལ་ཁབ་ཅིག་གི་མི་མང་དང་མི་རིགས་ཀྱི་འཐབ་རྩོད་ལ་དོན་དངོས་ཀྱིས་སྣེ་ཁྲིད་བྱེད་ཐུབ་པའི་ཉམས་མྱོང་གསར་གསོག་དང་རྣམ་པ་གསལ་སྟོན་བྱེད་ཐུབ་པ་བྱུང་བ་བཅས་ནི་འབྱུང་འགྱུར་བོད་མི་རིགས་ཀྱི་རང་དབང་འཐབ་རྩོད་བྱེད་སྟངས་ཀྱི་རྣམ་པ་གསར་པ་ཞིག་ལ་ཕྱོགས་ཡོངས་ནས་ཁ་ཕྱོགས་ཐུབ་ངེས་ཀྱི་ཡིད་ཆེས་ཀྱི་རྨང་གཞི་བརྟན་པོ་ཞིག་བསྐྲུན་ཐུབ་པའི་རྒྱལ་ཁའི་གྲུབ་འབྲས་མི་དམན་པ་ཕྱོགས་ཡོངས་ནས་ཐོབ་ཡོད་པར་ངོས་འཛིན་དང་ཡིད་ཆེས་ཞུ་བཞིན་ཡོད། འོན་ཀྱང་ཕྱི་ནང་གི་གནས་ཚུལ་མང་པོ་ཞིག་ལ་ལྟོས་ནས་ཐེངས་དེའི་ལས་འགུལ་ཁག་རེ་ཞིག་མཚམས་འཇོག་བྱས་པར་བོད་མི་སྤྱི་དང། ལྷག་པར་ལས་འགུལ་ནང་དངོས་སུ་མཉམ་ཞུགས་གནང་མཁན་གྱི་བོད་མི་ ༢༥༠༠༠ བརྒལ་བའི་འདོད་བབས་དང་མཐུན་པའི་ལས་དོན་ཞིག་མ་བྱུང་སྙམ་པའི་བློ་ཕམ་བྱུང་ཡོད་པ་ང་ཚོས་ཤེས་རྟོགས་ཐུབ་ཀྱི་ཡོད་ལ། དེ་ནི་མང་ཚོགས་ལ་སོ་སོའི་མི་རིགས་ཀྱི་འཐབ་རྩོད་དེ་ནུས་ཤུགས་ལྡན་པ་ཞིག་བྱེད་རྒྱུའི་སེམས་ཤུགས་དང་སྙིང་སྟོབས་ཚད་ལས་བརྒལ་བ་ཞིག་ཡོད་པའི་བཟང་ཕྱོགས་ཀྱི་རྣམ་པ་ཞིག་ལ་ང་ཚོས་ངོས་ལེན་དང་གུས་བརྩི་ཞུ་བཞིན་ཡོད། མི་མང་གི་ལས་འགུལ་མདུན་སྐྱོད་ཆེན་མོ་དེས་མ་འོངས་པར་འདི་ལས་ནུས་པ་དང་གཞི་རྒྱ་ཆེ་བའི་ལས་འགུལ་འབྱུང་ཐུབ་པའི་རྨང་གཞི་བརྟན་པོ་ཞིག་བཞག་ཡོད་པ་ངོས་འཛིན་དང་ཡིད་ཆེས་ཞུ་བཞིན་ཡོད། རྒྱ་གཞུང་གིས་རྫུན་གཏམ་ཡིག་ཆ་དཀར་པོའི་ལན་འདེབས་སུ་བོད་བདེན་རྫུན་དབར་གྱི་བར་ཁྱད་ (Tibet: The Gap between Facts and Fabrication) བཙན་བྱོལ་བོད་མིའི་སྒྲིག་འཛུགས་ནས་བོད་རྒྱལ་འབྲེལ་ལམ་གྱི་ཁོར་ཡུག་སྐྲུན་སླད་རྒྱ་ནག་གི་ཡིག་ཆ་དཀར་པོར་ལན་འདེབས་བྱ་རྒྱུ་མིན་པའི་སྲིད་བྱུས་ཡིན་སྟབས། གཞོན་ལྷན་ནས་འགན་འཁུར་རྐང་བཞེས་ཀྱི་ལན་འདེབས། བོད་བདེན་རྫུན་དབར་གྱི་བར་ཁྱད་དེབ་གཟུགས་ཐོག་དཔར་སྐྲུན་གྱིས་འཛམ་གླིང་ཡོངས་ལ་སྤེལ་ཡོད། གཞོན་ལྷན་གྱི་བོད་དབྱིན་གཉིས་ཀྱི་རང་བཙན་དུས་དེབ་ཀྱི་རྩོམ་སྒྲིག་པའི་འགན་འཁུར་ཞུས། བོད་ཀྱི་གཞོན་ནུ་ལྷན་ཚོགས་ནི་ལས་འགུལ་རང་བཞིན་གྱི་ལྷན་ཚོགས་ཡིན་པར་བརྟེན་ལོ་ལྟར་ཆབ་སྲིད་ལས་འགུལ་གྲངས་ལས་འདས་པས་གོང་དུ་འཁོད་པ་རྣམས་གལ་ཆེ་ལས་འགུལ་ཇི་སྤེལ་ཆ་ཤས་ཙམ་ཞུས་པ་ལགས་སོ།།
