སྤྱི་འཐུས། 2025-2026

གཡུང་དྲུང་བསྟན་འཛིན་ལགས་ནས་བོད་ནང་དུ་བོད་མིའི་རང་དབང་དང་། འགྲོ་བ་མིའི་ཐོབ་ཐང་གཙོས་པའི་བོད་དོན་ལས་འགུལ་སྣ་ཚོགས་སྤེལ་རྐྱེན་གྱིས། ཕྱི་ཕྱོགས་སུ་ཡོད་པའི་བོད་མིའི་ནང་ནས་རྒྱ་ནག་དམར་གཞུང་གིས་བཀའ་བརྒྱའི་ཉེས་ཆད་འགེལ་སའི་ཆེས་ཐོག་མའི་གྲལ་ནས་གཅིག་རེད་ལ། རྒྱ་ནག་དང་ཁ་ཐག་རིང་བའི་འདི་ལྟ་བུའི་རང་དབང་ཅན་གྱི་རྒྱལ་ཁབ་ཁག་གི་ནང་དུ་ཡང་དངོས་ཤུགས་བརྒྱུད་གསུམ་ནས་དམར་གཞུང་གིས་འཇིགས་བསྐུལ་དང་སྡིག་ར་ཇི་ཙམ་བྱས་ཀྱང་། ཐེ་ཚོམ་དང་འཇིགས་སྣང་མེད་པའི་ངང་མུ་མཐུད་ནས་བོད་དོན་འཐབ་བརྩོད་ཆེད་དུ་མདུན་བསྐྱོད་བྱེད་ཀྱི་ཡོད། ལྷག་ཏུ་ད་ཐེངས་ཁོང་ལྷོ་བྱང་ཨ་རིའི་སྤྱི་འཐུས་ལངས་པ་འདི་རྒྱ་ནག་ལ་བརྡ་ལན་གལ་ཞིག་རེད་ལ། འདིའི་ཐད་ནས་གཡུང་དྲུང་ལགས་ཀྱིས་གསུང་དོན། རྒྱ་ནག་ནི་བཙན་དབང་བཤད་མཁན་ཞིག་རེད། ཁོ་ཚོས་ང་ལ་དྲག་གནོན་བྱེད་པར་འབད་བརྩོན་བྱས་ཡོད་ཀྱང་། བོད་རྒྱལ་ཁབ་ལ་བཅང་བའི་བདག་གི་སྙིང་སྟོབས་ནི་གཞོམ་ཐབས་བྲལ་ཁར། གཡོ་བ་མེད་ལ། དུས་ནམ་ཡང་བརྟན་པོར་གནས་ཡོད། ངས་རང་གི་མི་རིགས་ཀྱི་ཆེད་དུ་ཡོད་ཚད་བློས་གཏོང་བྱེད་པར་གྲ་སྒྲིག་ཨང་གསར་ཡོད། གཡུང་དྲུང་བསྟན་འཛིན་ལགས་ནི་མདོ་ཁམས་སྒང་དྲུག་གི་ཡ་གྱལ་ཚ་བ་སྒང་དུ་སྐྱེས་ཤིང་། སྐུ་ན་ཆུང་དུས་ནས་བརྩེ་བའི་ཕ་མ་དང་གཅེས་པའི་རང་ཡུལ་སོགས་རྒྱབ་ཏུ་བསྐྱུར་ནས་བཙན་བྱོལ་དུ་འབྱོར། མ་ཟད་བཙན་བྱོལ་དུ་མ་འབྱོར་སྔོན་ནས་བོད་དོན་ལ་དོ་སྣང་དང་སེམས་ཁྲལ་ཅན་ཞིག་ཡིན་ལ། བཙན་བྱོལ་དུ་འབྱོར་རྗེས་ཐོག་མར་སུ་ཇ་བོད་ཕྲུག་ཁྱིམ་སྡེ་རུ་ཞུགས་ཤིང་རིམ་གྱིས་ཕྱི་ལོ་ ༢༠༠༩ ལོར་འཛིན་གྲྭ་བཅུ་པ་སློབ་མཐར་ཕྱིན།  སྤྱི་ལོ་ ༢༠༠༧ ནས་ ༢༠༠༩ བར་དུ་རྡ་སྟེང་བོད་ཁྱིམ་སློབ་གྲྭ་རུ་ཚན་རིག་སློབ་སྦྱོང་བྱས་ཤིང་། སྐར་གྲངས་ཚད་མཐོའི་ངང་ནས་འཛིན་གྲྭ་༡༢ སློབ་མཐར་ཕྱིན་ཡོད། ཕྱི་ལོ་ ༢༠༠༩ ནས་སྦེང་ལོར་མཐོ་སློབ་ (Christ University )ནང་དུ་རྫས་སྦྱོར་རིག་པའི་ཐོག་ཏུ་ཆེད་སྦྱོང་གིས་ཕྱི་ལོ་ ༢༠༡༤ ལོར་གཙུག་ལག་རབ་འབྱམས་པའི་སློབ་མཐར་ཕྱིན། ༢༠༡༤ ནས་ལོ་གཅིག་གི་རིང་དུ་ཡོ་རོབ་རྒྱལ་ཁབ་ (Finland – Lappeenranta university of Technology) གཙུག་ལག་སློབ་ཆེན་ནང་དུ་བོད་ཀྱི་ཆུ་བོ་ཆེན་པོ་ཡར་ཀླུང་གཙང་པོའི་རྫས་སྦྱོར་སོགས་ཀྱི་ཐོག་ཏུ་ཞིབ་འཇུག་བྱས་ཤིང་། ལོ་མཇུག་ཏུ། དེའི་ཐད་ཀྱི་སྙན་ཐོ་ཞིབ་འཇུག་རྩོམ་ཡིག་ཞིག་ཀྱང་ཚན་རིག་དང་འབྲེལ་བའི་དུས་དེབ་ཐོག་ཏུ་འཁོད་ཐུབ་པ་བྱུང་ཡོད། ཕྱི་ལོ་ ༢༠༡༦ ནས་ ༢༠༡༩ བར་དུ་ཇར་མི་ནེ་གཞུང་འབྲེལ་གྱི་སློབ་ཡོན་ཐུབ་པའི་ཐོག་ནས་གཙུག་ལག་སློབ་གྲྭ་ཆེན་མོ་ (Brandenburg University of Technology, Germany) ནང་དུ་རྫས་སྦྱོར་རིག་པའི་ཐོག་ནས་འབུམ་རམས་པའི་སློབ་མཐར་ཕྱིན་ཞིང་། སློབ་ཡུན་དེའི་རིང་དུ་རྫས་སྦྱོར་རིག་པ་དང་འབྲེལ་བའི་དཔྱད་རྩོམ་སྣ་ཚོགས་བྲིས། མ་ཟད་བརྩམས་ཆོས་རེ་ཟུང་འཛམ་གླིང་ལ་སྙན་གྲགས་ཆེ་བའི་དུས་དེབ་འགའ་ནང་དུ་འཁོད་ཐུབ་པ་བྱུང་ཡོད། གཡུང་དྲུང་བསྟན་འཛིན་ལགས་ ༢༠༡༩ ལོའི་ལོ་མཇུག་ཙམ་ནས་གནས་སྤོས་བྱང་ཞིང་། ཁྲོ་རོན་ཁྲོ་གཙུག་ལག་སློབ་ཆེན་ནང་དུ་རྫས་སྦྱོར་རིག་པ་དང་ཁོར་ཡུག་སྡེ་ཚན་གྱི་ནང་དུ་ཉམ་ཞིབ་པ་དང་མཐོ་རིམ་སློབ་ཁྲིད་པའི་ཕྱག་ལས་གནངས་དང་གནང་བཞིན་པ་རེད་པ། ཁོང་གིས་ཆུང་དུས་སློབ་གྲྭ་རུ་ཡོད་སྐབས་ནས་བཟུང་ད་བར་རྒྱུན་མ་ཆད་པར་བོད་དོན་ལས་འགུལ་སྣ་ཚོགས་སྤེལ་མཁན་ཞིག་ཀྱང་ཡིན་པ་རེད། དཔེར་ན། སློབ་གྲྭ་རུ་ཡོད་སྐབས་ཕྱི་ལོ་ ༢༠༠༥ ནས་ ༢༠༠༩ བར་དུ་གཞུང་འབྲེལ་མིན་པའི་བོད་ཀྱི་ཁོར་ཡུག་གོ་རྟོགས་བསྟི་གནས་ཁང་གི་ཚོགས་མི་བྱས་ཤིང་། བོད་ཀྱི་ཁོར་ཡུག་ཐད་ལ་ལས་འགུལ་སྣ་ཚོགས་སྤེལ། ལྷག་པར་དུ་ ༢༠༠༧ ལོའི་དུས་འཁོར་དབང་ཆེན་སྐབས་སུ་ ༧ སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་གཅན་གཟན་ལྤགས་པའི་ཐད་དུ་བཀའ་སློབ་གནང་རྗེས། བོད་གཞིས་བྱེས་གཉིས་ཀྱི་ཆོས་ཞུ་ལ་རྣམས་ལ། དེའི་ཐད་ནས་གོ་རྟོགས་ཆེ་རུ་སྤེལ་ཡ་དང་། མཚམས་འཇོག་གི་མཚན་རྟགས་བསྡུ་རུབ་སོགས་ཀྱི་ཐད་ལ་ལས་འགུལ་ཤུགས་ཆེན་སྤེལ་འདུག ། ཕྱི་ལོ་ ༢༠༠༧ ནས་ ༢༠༠༩ བར་དུ་རྡ་སྟེང་བོད་ཁྱིམ་སློབ་གྲྭའི་རྒན་བདག་གི་འགན་ཁུར་གནང་ཡོད་ལ། རྒན་བདག་གནང་རིང་། སློབ་གྲྭའི་ནང་དུ་ཡོད་པའི་ཉམ་ཐག་སློབ་མ་རྣམས་ལ་སློབ་མ་གཞན་ཚོས་ལྟ་རྟོགས་གང་ཐུབ་བྱེད་རྒྱུ་དང་། ཤེས་ཡོན་ཏོག་ཙམ་དམན་པའི་སློབ་མ་ཚོ་ལ་ཆེད་དམིགས་ཀྱིས་དམིགས་བསལ་གཟའ་མཇུག་སློབ་གྲྭ་ཆེད་བཙུགས། དེ་བཞིན་ཧི་མ་ཅལ་ནང་དུ་ཡོད་པའི་བོད་ཕྲུག་ཁྱིབ་སྡེ་ཡོངས་རྫོགས་ཀྱི་རྒན་བདག་རྣམས་བསྡུ་བསྐོང་ཐོག །དམིགས་བསལ་ཚོགས་ཆེན་ཐེངས་དང་པོ་འཚོགས་ཡ་སོགས་གསར་གཏོད་རང་བཞིན་ཅན་གྱི་ཕྱག་ལས་སྣ་ཚོགས་གནང་ཡོད། སྦེང་ལོར་མཐོ་སློབ་འགྲོ་སྐབས་སུ་ཕྱི་ལོ་ ༢༠༡༠ ནས་ ༢༠༡༡ བར་དུ་སྦེང་ལོར་ས་གནས་གཞོན་ནུའི་དྲུང་ཆེ་དང་། ཕྱི་ལོ་ ༢༠༡༡ ནས་ ༢༠༡༢ བར་དུ་ས་གནས་གཞོན་ནུའི་ཚོགས་གཞོན་གནངས། ཕྱི་ལོ་ ༢༠༡༡ ཟླ་ ༡༢ ནང་དུ་རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་དྲུག་པའི་ཚོགས་གཙོ་བྱས་ཤིང། དེའི་སྐབས་སུ་དམིགས་བསལ་བོད་ཕྱི་ནང་གཉིས་ཀྱི་རང་ལུས་མེར་སྲེག་གནང་མཁན། རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་ལས་འགུལ་ཤུགས་ཆེ་རུ་སྤེལ་ཐབས་སོགས་ཀྱི་ཐད་ལ་བགྲོ་གླེང་གནང་ཡོད། ཕྱི་ལོ་ ༢༠༡༡ ལོར་བོད་ནང་ཛ་དྲག་གི་གནས་སྟངས་ལ་བརྟེན་ནས་བོད་གླེང་བ་ཞེས་པའི་ཚོགས་པ་གསར་བཙུགས་དང་། ཚོགས་མི་རྣམས་རྒྱ་གར་ས་གནས་སྣ་ཚོགས་ལ་བསྐོར་བསྐྱོད་ཀྱིས་བོད་དོན་དྲིལ་བསྒྲགས་ཤུགས་ཆེན་བྱས། ལྷག་ཏུ་རྒྱ་གར་གྱི་མཐོ་སློབ་འདྲ་མིན་ནང་དུ་ཡང་བོད་དོན་གཏམ་བཤད་གནང་ཐུབ་པར་བྱུང་ཡོད། སྤྱི་ལོ་ ༢༠༡༦ ལོར། འཇར་མི་ནེ་རུ་སློབ་སྦྱོང་བྱེད་སྐབས། Brandenburg University of Technology Germany ནང་དུ་རང་ཉིད་བོད་མི་དང་པོ་དང་གཅིག་པོ་ཡིན་སྐབས་སུ། སློབ་གྲྭའི་ནང་དུ་རྒྱལ་སྤྱིའི་དུས་སྟོན་སྐབས། རྒྱ་ནག་སློབ་ཕྲུག་ཚོད་བཀག་འགོག་དང་གནོན་ཤུགས་ཇི་ཙམ་སྤྲད་ཀྱང་མགོ་བོ་མ་སྒུར་བར། སློབ་སྤྱི་དང་གནད་ཡོད་ཁག་ལ་འབྲེལ་གཏུགས་ཀྱིས། རང་ཉིད་བོད་མིའི་ངོ་བོ་ཐོག་ནས་བོད་ཀྱི་རྒྱལ་དར་གཙོས་པའི་བོད་ཀྱི་མཚོན་དོན་གལ་ཆེན་ཁག་གདེང་ཆའི་ཐོག་ཏུ་མངོན་ཐུབ་པར་བྱས་ཡོད་ལ། རྒྱ་ནག་གི་སློབ་ཕྲུག་ཚོ་དང་ལྷན་དུ་བོད་དོན་སྐོར་ནས་བགྲོ་གླེང་དང་གོ་རྟོགས་མི་དམན་པ་སྤེལ་ཡོད། ཇར་མི་ནི་རུ་སློབ་སྦྱོང་བྱེད་སྐབས་རྒྱལ་ས་ (Berlin) རུ་ས་གནས་བོད་ཀྱི་བྱིས་པ་རྣམས་ཀྱི་ཆེད་དུ་གཟའ་མཇུག་བོད་ཀྱི་སྐད་ཡིག་འཛིན་གྲྭ་གསར་འཛུགས་བྱས་ཡོད། ཕྱི་ལོ་ ༢༠༡༧ ཟླ་ ༡༠ པའི་ཚེས་ ༡༧ ཉིན་ཡོ་རོབ་མཐུན་ཚོགས་ཀྱི་གྲོས་ཚོགས་ནང་དུ་བོད་ཀྱི་གནས་བབ་དང་འབྲེལ་བའི་གཏམ་བཤད་བྱས་འདུག ། ཕྱི་ལོ་ ༢༠༡༧ ལོའི་རྒྱ་གར་ལ་ཆེད་བསྐྱོད་ཀྱིས་ཏ་ལི་བླ་མའི་མཐོ་སློབ་གཙོས་པའི་ས་གནས་མཐོ་སློབ་ཁག་གི་ནང་དུ། ཇར་མི་ནི་གཙུག་ལག་སློབ་ཆེན་ནང་དུ་ཇི་ལྟར་ཚུད་མིན་དང་། གཞུང་འབྲེལ་གྱིས་སློབ་ཡོན་རག་ཐབས་སོགས་ཀྱི་ཐད་ལ་གཏམ་བཤད་བྱས། ༢༠༢༡ ཟླ་ ༩ པ་ནས་བཟུང་གངས་ལྗོངས་ཆོས་ལྡན་གླིང་གི་ཤེས་ཡོན་འགན་འཛིན་གནང་ཐོག །ཚོགས་གཙོ་དང་ལས་རོགས་རྒྱུན་ལས་རྣམས་ཀྱི་རྒྱབ་སྐྱོར་འོག་དམིགས་བསལ་ཤེས་ཡོན་དང་འབྲེལ་བའི་ལས་འགུལ་སྣ་ཚོགས་སྤེལ་འདུག ། དཔེར་ན། གཟའ་མཇུག་སློབ་གྲྭའི་སློབ་དེབ་གསར་པ་དཔར་བསྐྲུན་ཞུས་པ། དེ་བཞིན། ས་གནས་བོད་ཀྱི་སྤྱི་ཚོགས་སྲ་བརྟན་ཆེད་དུ་ན་གཞོན་རྣམས་ལ་ཆེད་དམིགས་ཀྱིས། ཕྱི་ལོ་ ༢༠༢༡ ཟླ་ ༩ པའི་ནང་གངས་ལྗོངས་ཆོས་ལྡན་གླིང་སློབ་ཕྲུག་ཚོགས་ཆུང་གསར་འཛུགས་དང་། ཕྱི་ལོ་ ༢༠༢༢ ཟླ་ ༩ པའི་ནང་གངས་ལྗོངས་ཆོས་ལྡན་གླིང་གཞོན་ནུ་མཐུན་ཚོགས་གསར་འཛུགས་བྱས་ཤིང་། སློབ་ཕྲུག་དེ་རྣམས་ཀྱིས་ནམ་རྒྱུན་བོད་ཀྱི་སྤྱི་ཚོགས་ནང་དུ་བོད་ཀྱི་སྐད་ཡིག་དང་རིག་གཞུང་སོགས་ལ་ལས་འགུལ་སྣ་ཚོགས་སྤེལ་ཞིང་། བོད་མི་རིགས་ཀྱི་མ་འོངས་མདུན་ལམ་དང་རྩ་དོན་ལ་གསོན་ཤུགས་འཕར་མ་ཞིག་སྦྱིན་ཡོད་པ་ནི་ཀུན་ལ་གསལ་བ་ལྟར་ཡིན། ལོ་ལྔའི་འོག་ལ་ཡིན་པའི་ཁྲོ་རོན་ཁྲོ་ས་གནས་བོད་ཀྱི་བྱིས་པ་རྣམས་ལ་ཆེད་དམིགས་ཀྱིས། ༢༠༢༣ ཟླ་ ༤ པའི་ནང་གངས་ལྗོངས་བྱིས་པའི་བོད་ཀྱི་སྐད་ཡིག་བསྟི་གནས་ཁང་གསར་འཛུགས་ཐོག ། ད་སྐབས་ལོ་ལྔའི་འོག་ཀྱི་བྱིས་པ་དྲུག་བཅུ་ཙམ་ལ་བོད་ཀྱི་སྐད་ཡིག་གི་ས་བོན་འདེབས་བཞིན་པ་ཡིན། ༢༠༢༡ སྤྱི་ཟླ་ ༩ ནང་ཨོན་ཁྲི་རའོ་བོད་རིགས་སྤྱི་འཐུས་ཚོགས་པའི་ཆབ་སྲིད་འགན་འཛིན་གྱི་ཐུགས་འགན་འོག །ས་གནས་ཚོགས་པ་ཆེ་ཁག་ལྔ་དང་མི་མང་རྣམས་མཉམ་རུབ་ཀྱི་ཐོག་ནས། བོད་དོན་ལས་འགུལ་ཧ་ཅང་ཤུགས་ཆེན་སྤེལ་དང་སྤེལ་བཞིན་པ་རེད་འདུག ། གཡུང་དྲུང་བསྟན་འཛིན་ལགས་ནི་ནམ་རྒྱུན་ནས་ང་ཚོའི་བོད་དོན་ལས་འགུལ་སྤེལ་སྐབས་ཆབ་སྲིད་ཚོགས་པ་སྣ་ཚོགས་ནས་རྒྱབ་སྐྱོར་ཐུབ་ཐབས་བྱེད་དགོས་པ་ལས་གཞུང་འཛིན་ཚོགས་པ་གཅིག་པོ་ལ་རེ་ན་མི་འགྲིག་པའི་ལྟ་བ་ཁྱེར་མཁན་ཞིག་ཡིན་ལ། རང་ཉིད་ཀྱིས་ཁེ་ན་ཌ་བོད་རིགས་སྤྱི་འཐུས་ཚོགས་པའི་ཆབ་སྲིད་འབྲེལ་མཐུད་པ་བྱེད་སྐབས། བོད་དོན་ལ་རྒྱུན་རིང་རྒྱབ་སྐྱོར་བྱེད་མཁན་ཞིག་དང་། དངོས་སུ་བོད་དོན་ལ་རྒྱབ་སྐྱོར་གྱིས་རྒྱ་ནག་ལ་སྐྱོན་བརྗོད་དྲག་པོ་བྱེད་མཁན། སྤྱི་འཐུས་གྷར་ནེ་ཊྲི་ལགས། ༢༠༢༢ ལོར་ཐོག་མར་དམངས་གཙོ་དུས་ཆེན་སྐབས་སུ་སྐུ་མགྲོན་ལ་གདན་ཞུས་དང་། རྗེས་སུ་སྤྱི་ལོ་ ༢༠༢༣ དང་ ༢༠༢༥ གཉིས་ཀར་གསུམ་བཅུ་དུས་དྲན་ལ་མཉམ་ཞུགས་ཙམ་མིན་པར། དགྲ་བོ་རྒྱ་ནག་གི་གཞུང་ཚབ་མདུན་དུ་རྣོ་ངར་ལྡན་པའི་གཏམ་བཤད་གནང་ཐུབ་པར་བྱུང་ཡོད། གཡུང་དྲུང་བསྟན་འཛིན་ལགས་བོད་རིགས་སྤྱི་འཐུས་ཚོགས་པའི་ཁྱབ་སྲིད་འགན་འཛིན་སྐབས། བུ་ཁྲིད་ལགས། དེ་བཞིན་བོད་དོན་རྒྱབ་སྐྱོར་ཚོགས་པ་སོགས་ཀྱིས། དབུས་གྲོས་ཚོགས་ནང་དུ་བོད་ཀྱི་ཉིན་མོ་སྲུང་བརྩི་ཐུབ་པ་བྱུང་ཡོད། དེ་བཞིན། སྤྱི་ལོ་ ༢༠༢༢ཟླ་ ༡༢ ཚེས་ ༡༥ ཉིན། བོད་རིགས་སྤྱི་འཐུས་ཚོགས་པ་གཙོས་པའི་ཚོགས་པ་ཁག་གིས་སྣེ་ཁྲིད་འོག ། ཁེ་ན་ཌ་གྲོས་ཚོགས་ནང་དུ་བོད་དོན་དང་འབྲེལ་བའི་ཁྲིམས་འཆར་མང་པོ་ཞིག་གཏན་འབེབ་ཐུབ་པར་བྱུང་ཡོད། ཕྱི་ལོ་ ༢༠༢༢ ཟླ་ ༥ པའི་ནང་དུ་ལག་གྲུག་རྩེད་མཁན་དང་འགྲོ་བ་མིའི་ཐོབ་ཐང་རྩོད་ལེན་པ་གྲགས་ཅན་ (Enes Kanter Freedom ) ཁེ་ན་ཌ་ས་གནས་སུ་གདན་འདྲེན་གྱིས་གཟེངས་བསྟོད་མཛད་སྒོ་གོ་སྒྲིག་ཞུས་འདུག ། དེ་བཞིན་ཕྱི་ལོ་ ༢༠༢༣ ཟླ་ ༧ པའི་ནང་ས་གནས་བོད་ཀྱི་ན་གཞོན་རྣམས་ལ་ལག་གྲུག་རྩེད་འགྲན་ཆེན་མོ་གོ་སྒྲིག་དང་། མཐའ་མའི་རྩེད་འགྲན་སྐབས་སུ་སླར་ཡང་སྐུ་ཞབས་ (Enes Kanter Freedom ) ལགས་སྐུ་མགྲོན་གཙོ་བོ་རུ་གདན་འདྲེན་ཞུས། ཕྱི་ལོ་ ༢༠༢༢ ཟླ་ ༡༢ ཚེས་ ༡༤ ཉིན། ཚོགས་པ་ཆེ་ཁག་ལྔས་སྣེ་ཁྲིད་པའི་ཁེ་ན་ཌའི་རྒྱལ་ས་ཨོ་ཁྲ་ཝ་རུ་ཆེད་བསྐྱོད་ཀྱིས། དབུས་གྲོས་ཚོགས་ནང་ནས་རྒྱ་བོད་ཞི་བའི་གྲོས་མོལ་དགོས་ཞེས་པའི་བོད་དོན་གྲོས་ཆོད་གཏན་འབེབས་བྱུང་ཡོད། ༢༠༢༣ ཟླ་ ༣ ཚེས་ ༨ ཉིན། བོད་ཀྱི་ཆབ་སྲིད་བརྩོན་ཟུར་གྲགས་ཅན། གློག་བརྙན་འཇིགས་བྲལ་བཟོ་བསྐྲུན་པ་དཔའ་བོ་དོན་འགྲུབ་དབང་ཆེན་ལགས་ཁེ་ན་ཌ་ས་གནས་སུ་ཐོག་མར་གདན་ཞུས་ཀྱིས། ས་གནས་མི་མང་ལ་གློག་བརྙན་འཇིགས་བྲལ་གཟིགས་འབུལ་དང་འབྲེལ། དཔའ་བོ་དོན་འགྲུབ་དབང་ཆེན་ལགས་ལ་ཆེ་མཐོང་གི་བྱ་དགའ་ཕུལ་ཡོད། ༢༠༢༣ ཟླ་ ༤ ཚེས་ ༢༦ ཉིན། བརྙན་ཐུང་བཅད་གཏུབ་དང་འབྲེལ། ༧ གོང་ས་སྐྱབས་མགོན་ཆེན་པོ་མཆོག་ལ་མཚན་སྨད་དང་ཟུར་ཟ་བྱེད་མཁན་གྱི་ཚོགས་སྡེ་དང་གསར་ཁང་ཁག་ལ། ཡིག་ངག་གཉིས་ཀའི་ཐོག་ནས་ངོ་རྒོལ་གྱི་ལས་འགུལ་ཤུགས་ཆེན་སྤེལ་དང་སྤེལ་བཞིན་པ་ཡི ༢༠༢༣ ཟླ་ ༥ ཚེས་ ༡༡ ཉིན་ཨོ་ཁྲ་ཝ་རུ་ཆེད་བསྐྱོད་ཀྱིས། ཁེ་ན་ཌ་གྲོས་ཚོགས་འཐུས་མི་བཅུ་གཅིག་ལ་རེ་རེ་བཞིན་ཐུག་འཕྲད་ཀྱིས་བོད་ཀྱི་གནས་བབ་འགྲེལ་བརྗོད་དང་སྦྲགས། ཁེ་ན་ཌ་གཞུང་འགྲེལ་གྱིས་བོད་དོན་འབྲེལ་མཐུད་པ་ཞིག་བསྐོ་བཞག་ཡོང་བའི་རེ་བསྐུལ་ཞུས་པ་སོགས། བོད་དོན་ལ་རྒྱབ་སྐྱོར་སྔར་ལས་ཤུགས་ཆེན་གནང་བའི་རེ་བ་ཞུས་འདུག ། ༢༠༢༣ ཟླ་ ༣ ཚེས་ ༡༩ ཉིན། ཁེ་ན་ཌའི་ནང་དུ་བོད་རིགས་ཡིག་ཆ་མ་འགྲིག་མཁན་རྣམས་ལ་རྒྱབ་སྐྱོར་གྱི་ལས་འགུལ་སྤེལ་ཡོད་ལ། ད་དུང་མུ་མཐུད་ནས་གནད་ཡོད་མི་སྣ་རྣམ་ལ་འབྲེལ་གཏུག་གིས་ཡིག་ཆ་མེད་པའི་དཀའ་ངལ་སེལ་ཐབས་ལ་འབད་བརྩོན་བྱེད་བཞིན་པ་རེད་འདུག ། སྤྱི་ལོ་ ༢༠༢༤ ཟླ་ ༧ ནང་དུ་འཛམ་གླིང་གི་མི་སེར་ཞེས་པའི་མཛད་སྒོའི་ཐོག་ཏུ་མགྲོན་བརྡ་འབྱོར་བ་བཞིན་བཅར་རྒྱུ་བྱུང་ལ། མཛད་སྒོ་དེ་ནི་རྒྱ་ནག་གི་དཔོན་ངན། ཞི་ཅི་ཕན་གྱི་མི་རིགས་རྩ་གཏོར་གྱི་བྱེད་བབ་ལ་ཁྲིམས་གཏུག་གྱི་ལས་འགུལ་ཞིག་རེད་ལ། དེའི་སྐབས་སུ་རང་ཉིད་བོད་མང་དུ་སྐྱེས་ཤིང་། རྒྱ་ནག་གི་བྱེད་སྟངས་དངོས་སུ་མཐོང་མཁན་ཞིག་ཡིན་པའི་ཆ་ནས་བདེན་དཔང་ཚུལ་གྱིས་ཁྲིམས་མཛོད་པའི་མདུན་དུ་གཏམ་གླེང་བྱས་ཞིང་། ཞི་ཅི་ཕན་དངོས་སུ་མི་རིགས་རྩ་གཏོར་གྱི་ལས་གཞི་ལ་འབད་མཁན་གྱི་ཉེས་ཅན་པ་ཞིག་ཡིན་པའི་ངོས་འཛིན་གྱིས་ཁྲིམས་དཔོན་ནས་གྱོད་དོན་ཐག་གཅོད་བྱས་ཡོད། འདི་ནི་བདེན་པ་བརྩོད་མཁན་ཞིག་གི་ངོས་ནས་བསམ་ན་རྒྱལ་ཁ་ཆེན་པོ་ཞིག་ལོས་ཡིན། གཡུང་དྲུང་བསྟན་འཛིན་ལགས། སྤྱི་ལོ་ ༢༠༢༤ ཟླ་ ༡༡ ནང་ནས་ཁེ་ན་ཌ་བོད་དོན་རྒྱབ་སྐྱོར་ཚོགས་པའི་ནང་དུ་གླ་མེད་དྭང་བླངས་ངང་ནས་མཉམ་ཞུགས་བྱས་པ་རེད་ལ། དེའི་སྐབས་སུ་གནད་ཡོད་མི་སྣ་མང་པོ་ཞིག་དང་ཐུག་འཕྲད་ཀྱིས་ཉམ་མྱོང་ཡང་ཆེན་པོ་བསགས་ཡོད། གཡང་དྲུང་བསྟན་འཛིན་ལགས་ཀྱིས་གསུངས་དོན། རང་ཉིད་ཆུང་དུས་ནས་བྱམས་ཀྱིས་སྐྱོང་བའི་ཕ་མ་དང་ཞེན་ཆགས་ཆེ་སའི་རང་ཡུལ་སོགས་མི་ཚེའི་ཆ་ཤས་ལྟ་བུ་མང་པོ་ཞིག་བློས་གཏོང་ཐོག་ནས་བཙན་བྱོལ་དུ་འབྱོར་ཞིང་། བོད་འབངས་ཡོངས་ཀྱི་དཔྲལ་བའི་མིག་དང་ཁོག་པའི་སྙིང་ལྟར་ ༧ སྤྱི་ནོར་གོང་ས་སྐྱབས་མགོན་ཆེན་པོ་མཆོག་དང་། བོད་ཕྲུག་ཁྱིམ་སྡེས་ལམ་སྟོན་དང་བཀའ་དྲིན་ལས་དེང་དུས་ཀྱི་ཤེས་ཡོན་མི་དམན་པ་ཐོབ་ཐུབ་པ་བྱུང་ཡོད་ལ། ད་ནི་རང་ཉིད་ཀྱིས་དེ་དག་ལ་དྲིན་ལན་འཇལ་བའི་དུས་ཚོད་ཅིག་དང་། ལྷག་པར་དུ་ཉག་ཕྲ་བའི་བོད་མི་རིགས་ཀྱི་ལས་དབང་ལ་བསམ་བློ་གཏང་ན་ཆེས་གལ་ཆེ་ཤོས་དང་ཕན་ཆེ་ཤོས་ནི་སྤྱི་ཚོགས་ཞབས་ཞུ་དེ་ཉིད་ཡིན་པའི་ངོས་འཛིན་ཐོག་ནས། ད་སྐབས་རང་ཉིད་ཀྱི་ཆེད་ལས་ཞོར་ནས་གངས་ལྗོངས་ཆོས་ལྡན་གླིང་དུ་ཆབ་སྲིད་དང་ཤེས་རིག་གཉིས་ཀའི་འགན་འཛིན་གཅིག་ལྕོགས་བྱེད་ཀྱི་ཡོད། ཅེས་གསུངས།