སྤྱི་འཐུས། 2025-2026

བསྟན་འཛིན་ཆོས་འཕེལ་ལགས་ནི། ཕྱི་ལོ་ ༡༩༦༤ ཟླ་ ༠༣ ཚེས ༠༥ རྒྱ་གར་ཧི་མ་ཅལ་མངའ་སྡེའི་ཀུ་ལུའུ་རྫོང་ནང་ཡོད་པའི་སན་ཇེ་རུ་སྐྱེས། དེ་ནས་༡༩༦༦་་༦༨༧ཙམ་ལ་བོན་གཞིས་ཌོ་ལན་ཇི་རུ་གཞིས་ཆགས་གསར་སྐྲུན་སྐབས་སུ་གཞིས་སྤོས་བྱས་པ་ནས་བཟུང་ད་བར་བོད་གཞིས་ཌོ་ལན་ཇེ་རུ་གནས་དང་གནས་མུས་ཡིན། གཞིས་ཆགས་དེ་རུ་གཞི་རིམ་སློབ་གྲྭར་སོང། ཕྱི་ལོ་ ༡༩༧༨ ལོར་བོད་གཞུང་གཏན་སློབ་སིམ་ལ་སློབ་གྲྭའི་ནང་སློབ་འཇུག་དང་ ༡༩༨༣ ལོར་འཛིན་རིམ་བཅུ་བའི་ཡིག་རྒྱུགས་ཕུལ་ཡོད་ཀྱང། རྒྱུ་མཚན་དུ་མའི་རྐྱེན་གྱིས་མུ་མཐུད་སློབ་སྦྱོང་བྱེད་རྒྱུའི་གོ་སྐབ་ས་ཤོར། འོན་ཀྱང་ལོ་གཉིས་ལྷག་སྨན་རིའི་དགོན་དུ་༸སྐྱབས་རྗེ་སྨན་རིའི་ཁྲི་འཛིན་སོ་གསུམ་པ་མཆོག་གི་དྲུང་དུ་དགོན་པི་ཡིག་ཚང་ལས་དྲུང་གི་སྦྱོང་བརྡར་དང་ལས་ཁུར་ཞུས། དུས་དེ་ནས་ ༡༩༩༧ བར་ཕ་མ་དང་མཉམ་ལོ་ལྟར་དགུན་དུས་སུད་ཚོང་གི་ཚོང་གཉེར་ཆེད་དུ་རྒྱ་གར་རྒྱལ་ས་ཀ་ལི་ཀ་ཏ་རུ་མུ་མཐུད་དུ་སོང། དུས་མཚུངས་སུ་གཞིས་ཆགས་ནང་གཞུང་འབྲེལ་ཚོགས་པ་ས་གནས་འཐུས་ཚོགས་དང་རང་བདེན་ཚོགས་ཆུང་གཉིས་ཀྱི་ནང་ཚོགས་གཙོ་གཞོན་གཉིས་ཀྱི་ལས་ཁུར་ཞུས་མྱོང་ལ་གཞུང་འབྲེལ་མ་ཡིན་པའི་ཚོགས་པ་ས་གནས་གཞོན་ནུའི་ནང་ལའང་ཚོགས་གཙོ་དང་དྲུང་ཆེའི་ལས་ཁུར་ཞུ་རྒྱུ་ཡང་བྱུང། ཕྱི་ལོ་ ༢༠༠༠ ནས་ ༢༠༠༢ བར་བོད་གཞིས་ཌོ་ལན་ཇིའི་ས་འགོ་ལས་ཁུངས་ནང་རང་ཁོངས་ལས་དྲུང་གི་ལས་ཁུར་ཡང་ཞུ་རྒྱུའི་གོ་སྐབས་ཀྱང་བྱུང་། ༢༠༠༦ ནས་ ༢༠༡༢ བར་ཀ་ལི་ཀ་ཏ་བོད་མིའི་སུད་ཚོང་སྒྲིག་འཛུགས་ཀྱིས་ཚོགས་གཙོའི་ལས་ཁུར་ཞུས་རིང་ཚོགས་པའི་སྒྲིག་གཞི་གསར་བཟོ་དང་མི་མང་གི་མངོན་འདོད་ལྟར་གོང་ཚད་གཏན་འབེབ་ཐོག་དངོས་ཟོག་ཚོང་རྒྱུ་ཡོད་པའང་བཟོ་ཐུབ་པ་བྱུང་བ་མ་ཟད། བཙན་བྱོལ་བོད་མིའི་ཚོང་བ་ཚོགས་པའི་བཀའ་དགོངས་བཞིན་ཚོགས་པ་དེབ་སྐྱེལ་ཡང་བཟོ་ཐུབ་པ་བྱུང་ཡོད། ཕྱི་ལོ་ ༢༠༡༣ ནས་༢༠༢༠ བར་ཨར་ལས་བོགས་ལེན་པའི་ལས་ཀ་བྱས་པའི་ཨར་ལས་པའི་ཉམས་མྱོང་གང་འཚམས་ཡོད། ཕྱི་ལོ་ ༢༠༢༡ ཟླ་ ༠༨ ཚེས་ ༠༡ ནས་ ༢༠༢༤ ཟླ་ ༠༧ ཚེས་ ༣༡ བར་བོད་གཞིས་ཌོ་ལན་ཇིའི་ས་གནས་འགོ་འཛིན་ལས་ཁུར་ཞུས་རིང་གཞིས་ཆགས་ལ་ཕན་པའི་ལས་འཆར་འགའ་ཞིག་སྒྲུབ་ཐུབ་པ་བྱུང་ཡོད་པ་དང་སྐབས་མཚུངས་སུ་མདོ་སྨད་ས་གནས་རྒྱུན་ལས་ཀྱི་དྲུང་ཆེའི་འགན་འཁུར་མྱོང་ཡོད་པ་མ་ཟད། བོད་ལྗོངས་མདོ་སྨད་ཆོལ་ཁའི་དབུས་སྤྱི་ཁྱབ་ཁང་གི་ཚོགས་གཞོན་གྱི་ལས་ཁུར་ཞུ་བཞིན་པ་བཅས་སྤྱི་ཚོགས་ནང་རང་ངོས་ནས་ཞབས་ཕྱིའི་ཆ་ཤས་བླངས་མྱོང་བ་བཅས་ཀྱི་ངོ་སྤྲོད་མདོར་བསྡུས་སུ།