སྤྱི་འཐུས། 2025-2026

གུས་ལྷ་མོ་བཀྲ་ཤིས་བོད་ལྗོངས་མདོ་སྨད་ཆོལ་ཁའི་ཁྱབ་ཁོངས་ཨ་མདོ་རྨ་ཆུ་གྲོང་གསེབ་ཀྱི་འབྲོག་པའི་ཁྱིམ་ཚང་ཞིག་ཏུ་སྐྱེས་ཤིང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་གྱིས་ཕྱི་ལོ་ ༢༠༡༠ ལོར་རྒྱ་གར་བྱང་ཕྱོགས་མ་སུ་རི་བོད་ཁྱིམ་སློབ་གྲྭ་ནས་འཛིན་རིམ་བཅུ་གཉིས་སློབ་མཐར་ཕྱིན་པ་དང་། ཕྱི་ལོ་ ༢༠༡༠ ནས་ ༢༠༡༣ བར་ལོ་གསུམ་རིང་རྒྱ་གར་ལྷོ་ཕྱོགས་བྷེང་ལོར་གཙུག་ལག་སློབ་གཉེར་ཁང་དུ་ཚོང་འབྲེལ་སྡེ་ཚན་ཐོག་ཉེ་བའི་གཙུག་ལག་རབ་འབྱམས་པའི་ (BBA) སློབ་མཐར་ཕྱིན། ༢༠༡༥ ནས་ ༢༠༡༧ བར་ལོ་ངོ་གཉིས་ཀྱི་རིང་སྡེ་ར་སྡུན་ཨཡེ། ཨེམ། ཨཱེ་སེ། ཡུ་ནི་སན་ (IMS Unison University) གཙུག་ལག་སློབ་གཉེར་ཁང་དུ་ཚོང་འབྲེལ་སྡེ་ཚན་ (MBA) ཐོག་གཙུག་ལག་རབ་འབྱམས་པའི་སློབ་གཉེར་བགྱིས་ཏེ་བསླབ་པ་མཐར་སོན། སློབ་གྲྭའི་སྐབས་སློབ་སྦྱོང་བྱེད་ཞོར་དུ་སློབ་གྲྭའི་རྒན་བདག་དང་། སློབ་ཕྲུག་ཡར་རྒྱས་ཚོགས་པ་ཞེས་པ་གསར་འཛུགས་ཀྱིས་ཉམ་ཐག་སློབ་ཕྲུག་རྣམས་ཀྱི་བདེ་དོན་ལྟ་སྐྱོང་སོགས་ཀྱང་བྱས། མུ་མཐུད་མཐོ་སློབ་འགྲིམ་ཞོར། ཕྱི་ལོ་ ༢༠༡༠ ནས་ ༢༠༡༣ བར་བྷེང་ལོར་སློབ་ཕྲུག་ཡར་རྒྱས་ཚོགས་པའི་རྩིས་པ་དང་། དེ་རྗེས་ཕྱི་ལོ་ ༢༠༡༥ ནས་ ༢༠༡༧ བར་སྐབས་གཉིས་རིང་ཚོགས་པ་དེའི་ཚོགས་གཙོར་འོས་འདེམས་བྱུང་བ་བཞིན་འགན་ཁུར་ཞུས་ཤིང་། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གྱ་སྟོན་སྲུང་བརྩི་དང་འབྲེལ་'དུས་རབས་ཀྱི་ཉི་གཞོན། (Youth of Generation) ཞེས་པའི་དུས་དེབ་པར་བསྐྲུན་འགྲེམས་སྤེལ་དང་། མཐོ་སློབ་ཏུ་གསར་ཞུགས་གནང་མཁན་བོད་པའི་སློབ་ཕྲུག་རྣམས་ལ་མཐོ་སློབ་ནང་འཛུལ་ཞུགས་བྱ་ཕྱོགས་ཀྱི་་ལམ་སྟོན་ཕན་གྲོགས་ཞུ་སྒོའི་རིགས་ཀྱང་གང་ཐུབ་ཞུས། ཕྱི་ལོ་ ༢༠༡༦ ལོར་བོད་ཀྱི་སྲོལ་རྒྱུན་རིག་གཞུང་སྲུང་སྐྱོབ་ལ་དམིགས་ཏེ། སྤྱི་ཚོགས་ཀྱི་ཁེ་ལས་སྐེད་རགས་ཞེས་པ་གཞོན་སྐྱེས་ཐུན་མོང་གིས་གསར་འཛུགས་དང་། ཕྱི་ལོ་ ༢༠༡༧ ནས་ ༢༠༢༢ བར་སྐབས་གཉིས་རིང་སྡེ་ར་སྡུན་དོན་གྲུབ་གླིང་ས་གནས་མདོ་སྨད་ཆོལ་ཁས་ཚོགས་གཙོར་འོས་འདེམས་བྱུང་བ་བཞིན་དང་ལེན་འགན་ཁུར་ཞུས་ཏེ། ཀུན་གཟིགས་༸པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་ལོ་ངོ་ ༣༠ འཁོར་བའི་དགོངས་རྫོགས་རྗེས་དྲན་སྲུང་བརྩིའི་མཛད་སྒོ་ཆེན་མོ་ཞིག་གོ་སྒྲིག་ཞུས་པ་སོགས་གལ་ཆེའི་ལས་དོན་སྣ་མང་ཞིག་སྤེལ་རྒྱུའི་་གོ་སྐབས་བྱུང་བ་ནི་མདོ་སྨད་མི་མང་གི་དྲིན་གྱིས་བྱུང་སྙམ་དུ་སེམས་པ་ཡིན། ཕྱི་ལོ་ ༢༠༡༩ ལོར་སྡེ་ར་སྡུན་ཆོལ་གསུམ་གསར་འབྱོར་བོད་མིའི་བདེ་དོན་ཚོགས་པའི་ཚོགས་གཙོར་འོས་འདེམས་བྱུང་ཞིང་། ཚོགས་པའི་ཐོག་ནས་རི་བོ་དགེ་ལྡན་པའི་སྲོལ་འབྱེད་༸རྗེ་རྒྱལ་བ་ཙོང་ཁ་པ་ཆེན་པོ་དགོངས་པ་རྫོགས་ནས་མི་ལོ་ངོ་ ༦༠༠ འཁོར་བའི་དུས་དྲན་སྲུང་བརྩི་ཞུས་སྐབས། རྗེ་རིན་པོ་ཆེའི་མཛད་པ་འཕྲིན་ལས་དང་། པཎ་གྲུབ་བཅུ་བདུན་གྱི་མཛད་པའི་ལོ་རྒྱུས་སྐོར་པར་རིས་འགྲེམས་སྟོན་ཞུས། ཕྱི་ལོ་ ༢༠༢༡ ལོར་ཁོར་ཡུག་སྲུང་སྐྱོབ་དང་གོ་ལའི་གནམ་གཤིས་འགྱུར་ལྡོག་དང་འབྲེལ་ཏེ། སྤྱི་ཚོགས་དྲྭ་རྒྱའི་ཐོག་ཁོར་ཡུག་སྲུང་སྐྱོབ་ (Environment Care) ཅེས་པའི་ལས་འགུལ་ཞིག་སྤེལ་བ་དང་། དེ་བཞིན་ ༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུའི་སྐབས་ས་གནས་འོས་བསྡུའི་ཚོགས་མིའི་འགན་ཁུར་ཞུས། དེ་རྗེས་རྒྱ་གར་གྱི་རེ་ལ་ཡཱནྶེ་ཉེན་སྲུང་ཁེ་ཕན་ཚོང་ལས་ཁང་ (Reliance Nippon Life Insurance Company) དུ་ཟླ་དྲུག་ཙམ་ཞིག་རིང་ལས་ཀ་བྱས། ཕྱི་ལོ་ ༢༠༢༢ ཟླ་ ༧ ཚེས་ ༡ ཉིན་བོད་ལྗོངས་མདོ་སྨད་ཆོལ་ཁའི་དབུས་རྒྱུན་སྐབས་བཅོ་བརྒྱད་པར་འོས་འདེམས་དང་། དེ་ནས་ཚོགས་གཙོར་བདམས་ཐོན་གྱིས་ཕྱི་ལོ་ ༢༠༢༥ ཟླ་ ༡༠ ཚེས་ ༣༡ བར་ལས་ཡུན་ལོ་ངོ་གསུམ་དང་ཟླ་གསུམ་རིང་མདོ་སྨད་ཆོལ་ཁའི་དབུས་རྒྱུན་ཚོགས་གཙོའི་འགན་ཁུར་རང་ནུས་ཀྱིས་རེ་དོགས་འཇིགས་ཞུམ་ཆགས་སྡང་མེད་པར་གཟེངས་སུ་ཐོན་ཐུབ་པ་ཞུས་ཡོད་སྙམ་པ་དང་། ཚོགས་གཙོའི་ལས་ཡུན་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གོ་སྟོན་སྲུང་བརྩིའི་གོ་སྒྲིག་ཚོགས་ཆུང་གི་ཚོགས་མིར་ཡང་མདོ་སྨད་མི་མང་གིས་དམིགས་བསལ་ཚོགས་ཆེན་ཐོག་ནས་བསྐོ་གཞག་དང་འབྲེལ་དུས་རབས་ཉེར་གཅིག་པའི་བླ་ན་མེད་པའི་སྟོན་པ་ཆེན་པོར་མངའ་གསོལ་གྱི་མཚན་བསྟོད་འབུལ་ལམ་ཞུ་ཐུབ་པའི་བསོད་ནམས་ཀྱི་སྐལ་བཟང་གོ་སྐལ་ཐོབ་གྲལ་དུ་ཡང་བྱུང་། དེ་བཞིན་༸དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གི་༸སྐུའི་གྱ་སྟོན་གྱི་བརྟན་བཞུགས་བསྟར་འབུལ་དང་འབྲེལ་བཀའ་དྲིན་རྗེས་དྲན་གསེར་གྱི་གཟེངས་རྟགས་འབུལ་ལམ་ཞུས་ཐུབ་པ་སོགས་༸རྒྱལ་བའི་བཀའ་དགོངས་སྙིང་བཅངས་དང་། ཆོལ་གསུམ་བོད་མིའི་ཆིག་སྒྲིལ་ཐོག་ནུས་པ་མཉམ་སྤུངས། མདོ་སྨད་ཆོལ་ཁའི་དབུས་ས་གཉིས་ལ་ཞབས་ཕྱི་མི་དམན་ཙམ་ཞུས་པ་སོགས་མདོར་ན་ཕྱི་ལོ་ ༢༠༠༨ ནས་ད་བར་མོ་ལོ་ ༡༧ ལྷག་གི་རིང་བོད་མིའི་སྤྱི་ཚོགས་ནང་ཞབས་འདེགས་ཞུས་ཡོད་པ་བཅས་ཀྱི་ལོ་རྒྱུས་སྙིང་བསྡུས་སུ།