སྤྱི་འཐུས། 2025-2026

ཤེས་རབ་རྡོ་རྗེ་ནི་སྤྱི་ལོ་ ༡༩༨༩ ལོར་མདོ་སྨད་ཆབ་ཆའི་ཁོངས་གཏོགས་ཀྱི་རྨོག་རུ་མཁས་ཆེན་ཚང་ཞེས་པའི་ཡུལ་དེའི་སྟོང་དཔོན་གྱི་གོ་གནས་ཡོད་མཁན་འབྲོག་ཁྱིམ་ཞིག་ཏུ་སྐྱེས་ཤིང་། ཆུང་དུས་ཕ་མའི་བཀའ་དྲིན་གྱིས་རང་ལོ་ ༤ ཐོག་སློབ་གསོ་རོལ་མྱོང་གི་སྐལ་བ་ཐོབ། རིམ་བཞིན་སློབ་གྲྭ་ཆུང་འབྲིང་ཆེ་གསུམ་མཐར་ཕྱིན། སྤྱི་ལོ་ ༢༠༠༦ ལོར་རྒྱ་ནག་གི་ཆབ་སྲིད་དང་ཁྲིམས་ལུགས་ཆེད་སྦྱོང་ཐོག་མཐོ་སློབ་མཐར་ཕྱིན། ཡུན་རིང་མ་འགོར་བར་གུས་པའི་ཕ་ལགས་རྒྱ་གར་ནང་གནས་འཇལ་དུ་ཕེབས་སོང་། ཕྱིར་ཕ་ཡུལ་དུ་ལོག་དུས་༧གོང་ས་མཆོག་གི་བཀའ་རྩོམ་ངོས་ཀྱི་ཡུལ་དང་ངོས་མི་དམངས་དང་། བཀའ་སློབ་སྙིང་གི་ནོར་བུ་སོགས་ཕྱག་དེབ་ཁག་ཅིག་ཕ་ཡུལ་དུ་འཁྱེར་ཡོང་སྟེ་འགྲེམས་སྤེལ་བྱས་བ་ལ་བརྟེན་ནས། ཆབ་སྲིད་ཀྱི་དཀའ་ངལ་དང་གནོན་ཤུགས་འོག་ང་རང་རྒྱ་གར་དུ་ཡོང་དགོས་བྱུང་། བཙན་བྱོལ་ནང་འབྱོར་ཏེ་ཤེས་རབ་དགའ་ཚལ་སློབ་གླིང་དུ་སློབ་གཉེར་བྱས་ཏེ་སློབ་མཐར་སོན། སློབ་གྲྭའི་རང་མོས་གླེང་སྟེགས་ཀྱི་མདོ་འཛིན་པ་ལོ་གསུམ་གནང་མྱོང་། དེ་ནས་རིམ་བཞིན་ལྡི་ལི་ནས་ཨིན་ཇིའི་སྐད་བརྡ་རིག་པ་དང་ཆབ་སྲིད་། མུམ་བྷེ་ནང་ཚོང་ལས་རིག་པའི་ཐོག་སློབ་མཐར་ཕྱིན། སློབ་གཉེར་སྐབས་བཙན་བྱོལ་གྱི་ཚོགས་པ་སྐྱིད་སྡུག་གང་མང་ནང་དྭང་བླངས་ཐོག་ལས་ཀ་མང་པོ་བྱས་མྱོང་། ལྷག་པར་དུ་འཛམ་གླིང་ཏོག་དབྱིབས་ནད་དུག་དཀའ་ངལ་འཕྲད་སྐབས་སྒེར་ངོས་ནས་རྒྱུ་འབྱོར་བཏང་སྟེ་བོད་པ་མང་པོ་ལ་རོགས་རམ་བྱས་མྱོང་། གཞན་ ༼ བོད་ཀྱི་དུས་བབ༽ གཙོས་གསར་འགྱུར་བརྒྱུད་ལམ་ཁག་ཅིག་ལ་ཞབས་ཞུ་བྱས་ཟིན། སྤྱི་ལོ་ ༢༠༡༢ ལོར་སིང་ཀ་ཕོར་འཚོགས་པའི་ཨེ་ཤ་ཡའི་ན་གཞོན་གསར་བའི་ལྷན་ཚོགས་ཐོག་མཉམ་ཞུགས་བྱས། སྤྱི་ལོ་ ༢༠༡༨ ལོ་ཨེ་ཤ་ཡའི་ན་གཞོན་ཚོང་ལས་ལྷན་ཚོགས་ཀྱི་དབུས་རྒྱུན་ནང་གདམས་ཐོན་བྱུང་། ལོ་དེ་ནས་བཟུང་དྷོ་བྷེ། སང་གྷ་ཕོར། མ་ལེ་ཤི་ཡ། ཤྲི་ལིང་ཀ། འབྲུག་ཡུལ། ཐེ་ལན་རྒྱལ་ཁབ་སོགས་སུ་གཞུང་འབྲེལ་དང་། གཞུང་འབྲེལ་མ་ཡིན་པའི་ཟབ་སྦྱོང་དང་། ཞིབ་འཇུག་སྡེ་ཚན། དེ་བཞིན་ཆབ་སྲིད་དང་ཚོང་ལས་ཀྱི་ལས་གཞི་འདྲ་མིན་དང་མཉམ་ཞུགས་ཀྱིས་གཏམ་བཤད་མང་པོ་སྤེལ་མྱོང་། སྤྱི་ལོ་ ༢༠༢༤ ལོར་ཨེ་ཤ་ཡའི་གཞོན་སྐྱེས་ཚོང་ལས་ལྷན་ཚོགས་སྟེང་ཀུན་སྤྱོད་ལྡན་པའི་ན་གཞོན་ཚོང་ལས་པ་ཞེས་པའི་གཟིངས་རྟགས་ཐོབ། ད་ལྟ་མུམ་བྷེ་གྲོང་ཁྱེར་ནང་ཚོང་ལས་གཉེར་བཞིན་པ་བཅས་ཀྱི་ངོ་སྤྲོད་མདོར་བསྡུས་སུ། ཆབ་སྲིད་ལངས་ཕྱོགས། ༡ བོད་ཕྱི་ནང་གཉིས་ཀྱི་གནས་སྟངས་ཐད་རྒྱུས་མངའ་ཡོད་པ་གཞིར་བཞག་དབུ་མའི་ལམ་གྱི་སྲིད་བྱུས་ཐོག་ཐའེ་ཝན་གཙོས་རྒྱ་རིགས་རྣམས་ལ་འབྲེལ་མཐུད་དང་གོ་རྟོགས་དམ་ཟབ་གནང་རྒྱུ ༢ གཞོན་སྐྱེས་ཆེད་ལས་པ་མཉམ་འབྲེལ། ༣ ཚོང་ལས་ཐོག་གོ་སྐབས་འཚོལ་རྒྱུ།