སྤྱི་འཐུས། 2025-2026

གུས་མོ་རྨེའུ་དབང་འཛིན་ལྷ་མོ་ནི། ➤ ཕྱི་ལོ་ ༡༩༨༩ ལོར་སྤྱི་ཟུར་ཨ་མ་རྨེའུ་མགོན་པོ་མཚོ་ལགས་དང་མཉམ་དུ་རྒྱ་གར་ལ་ཡོང་སྐབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ཀུན་གཟིགས་༸པཎ་ཆེན་སྐུ་འཕྲེང་བཅུ་པ་ཆེན་པོ་མཆོག ༸སྐྱབས་རྗེ་ཀིརྟི་རིན་པོ་ཆེ་རྣམ་པ་གསུམ་གྱི་བཀའ་ལྟར་བཞུགས་སྒར་རྡ་རམ་ས་ལའི་བོད་ཁྱིམ་སློབ་གྲྭར་འཛིན་རིམ་བཅུ་པ་བར་དང་། བྷེལ་ཀོབ་བོད་ཁྱིམ་དུ་འཛིན་རིམ་ ༡༡ དང་ ༡༢ བར་སློབ་གཉེར་བྱས། ➤ དེ་རྗེས་ལྡི་ལི་（Kamala Nehru Delhi University) ལ་ལོ་རིམ་གཉིས་པར་འགྲོ་བཞིན་པའི་སྐབས། ༸གོང་ས་༸སྐྱབས་མགོན་ཆེན་པོས་དམིགས་བསལ་བཀའ་ཕེབས་དགོངས་དོན་ལྟར་དཔལ་ལྡན་སྐུ་སྒེར་ཡིག་ཚང་དང་ཐའེ་ཝན་སྐུ་ཚབ་དོན་གཅོད་ཁང་གཉིས་ཀྱིས་བཀོད་སྒྲིག་འོག་ཐའེ་ཝན་ཀྲུང་ཧྲན་གཙུག་ལག་སློབ་གཉེར་ཁང་（National Sum Yat Sen University, Taiwan）དུ་ཕྱི་ལོ་ ༢༠༠༢ ནས་ ༢༠༠༧ བར་ལོ་ངོ་ལྔའི་རིང་ཁེ་ལས་དོ་དམ་རིག་པར་རིགས་གཅིག་རྐང་འཛིན་གྱི་སློབ་སྦྱོང་མཐར་སོན། ཕྱི་ལོ་ ༢༠༠༨ ནས་ ༢༠༡༠ ལོ་གཉིས་ལྷག་རིང་བོད་གཞུང་ཕྱི་དྲིལ་ལས་ཁུངས་ཀྱི་རྒྱ་ཡིག་སྡེ་ཚན་དུ་སྡེ་ཚན་འགན་འཛིན་གྱི་གནས་རིམ་ཐོག་ཆོད་གན་ཞབས་ཕྱི་ཞུས། དེ་རྗེས་ལྡི་ལིར་རྒྱལ་སྤྱིའི་ཚོང་འབྲེལ་དང་བརྡ་འཕྲིན་རིག་པར་སློབ་གཉེར་བྱས། དེང་སྐབས་ལྡི་ལིར་ཚོང་ལས་བྱེད་བཞིན་ཡོད། དམིགས་འདུན་གཙོ་བོ་ནི། གུས་མོ་རྒྱ་ནག་གི་རིག་གནས་གསར་བརྗེ་ཆེན་པོའི་གོད་ཆག་འོག་སྐུ་སྲོག་ཤོར་བའི་རྨེའུ་རྒྱལ་པོ་ཡབ་ཡུམ་དང་། སྤྱི་ཟུར་ཨ་མ་རྨེའུ་མགོན་པོ་མཚོ་བཅས་ཀྱི་ཤ་ཁྲག་གི་རྒྱུད་ལས་བྱུང་བའི་མི་རབས་གསར་པ་ལོ་རྒྱུས་ཀྱི་འགན་འཁྲི་ཅན་ཞིག་ཡིན་པར་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ༸སྐྱབས་རྗེ་ཀིརྟི་རིན་པོ་ཆེ་རྣམ་གཉིས་ཀྱིས་ཐུགས་བརྩེ་བས་རྗེས་སུ་བཟུང་སྟེ་དམིགས་བསལ་གཟིགས་སྐྱོང་གནང་བའི་བཀའ་དྲིན་ཐུགས་རྗེ་ལ་བརྟེན་ནས་འཚར་ལོངས་བྱུང་བ་ཞིག་ཡིན་པར་བརྟེན། ལོ་རྒྱུས་དང་བཀའ་དྲིན་དེ་དག་ཡིད་ལ་བཅངས་ཏེ་རང་ནུས་གང་ལྕོགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་གཞུང་མང་གཉིས་ལ་སྲི་ཞུའི་ལས་དོན་གང་ཐུབ་ལྷག་བསམ་གཡོ་མེད་ཀྱིས་སྒྲུབ་པའི་གོ་སྐབས་ཐོབ་ཆེད། ད་ལམ་སྐབས་བཅོ་བརྒྱད་པའི་མདོ་སྨད་སྤྱི་འཐུས་སུ་ལང་བཞིན་ཡོད་ལགས་ན། བཀུར་འོས་མདོ་སྨད་མི་མང་ནས་གུས་མོར་ཡིད་ཆེས་དང་རྒྱབ་སྐྱོར་གནང་སྐྱོང་ཡོང་བ་ཞེས་འབོད་སྐུལ་ཞུ་བཞིན་ཡོད། ཐུགས་རྗེ་ཆེ།