སྤྱི་འཐུས། 2025-2026

སྤུ་ལ་ནམ་མཁའ་རྒྱལ་མཚན་ནི་སྦྲ་ཆེན་སྤུ་ལར་སྐྱེས། སྤྱི་ལོ་ ༢༠༠༧ ལོར་རྒྱ་གར་དུ་འབྱོར། སློབ་སྦྱོང་གི་རྒྱུད་རིམ།: གདན་ས་སྨན་རིའི་གླིང་ནས་ཐུན་མིན་མདོ་སྔགས་སེམས་གསུམ་གྱི་གཞུང་ཆེན་ཁག་གཙོས་ཐུན་མོང་གི་རིག་གནས་བརྡ་དག་སྙན་གསུམ་དང་རྒྱལ་རབས་ལོ་རྒྱུས་བཅས་ལ་ལོ་ངོ་ཉི་ཤུ་མ་ཟིན་ཙམ་སྦྱངས་པ་མ་ཟད་གདན་ས་སྨན་རི་ནས་གཞུང་ཆེན་རིག་གཅིག་རྐང་འཛིན་དང་བཅས་པ་བསླབ་པ་མཐར་སོན། ལས་ཀའི་ཉམས་མྱོང་།: བོད་ཀྱི་མཐོ་རིམ་སློབ་མའི་ཚོགས་ཆེན་ཐེངས་ ༡༥ པའི་སྐབས་ཀྱི་དྲུང་ཡིག་དང་གཡུང་དྲུང་བོན་གྱི་བགྲོ་གླེང་ཐེངས་ ༡༣ པའི་དྲུང་ཡིག་དེ་བཞིན་སྨན་རིའི་གཤེན་གྱི་གསང་སྔགས་སྒོམ་སྒྲུབ་གླིང་གི་དངུལ་གཉེར་དང་བོན་གཞིས་ས་གནས་འོས་བསྡུའི་ཟུར་དཔང་སོགས་བྱས། རྒྱལ་སྤྱིའི་ཚོགས་འདུ་སྐོར། རྒྱལ་སྤྱིའི་བོད་རིག་པའི་ཚོགས་ཆེན་གཙོས་པའི་ཚོགས་འདུ་ཆེ་ཕྲ་ཆུང་གསུམ་མང་པོ་ལ་དཔྱད་རྩོམ་སྒྲོག་སྦྱོང་དང་ཚོགས་འདུ་མཉམ་ཞུགས། དེ་བཞིན་ཚོགས་འདུ་གོ་སྒྲིག་སོགས་ཀྱི་ལས་ཀ་བྱས། རྩོམ་སྒྲིག་གི་ལས་ཀའི་སྐོར། གཡུང་དྲུང་བོན་གྱི་དཔེ་མཛོད་ཁང་དང་གཡུང་དྲུང་བོན་གྱི་སྒྲུབ་འདུས་སྡེ་སོགས་ལ་ལོ་མང་རིང་དཔེ་ཆ་ཞུ་དག་གི་ལས་ཀ་བྱས།བོན་སྒོ་<<དཔྱད་རྩོམ་ཕྱོགས་བསྒྲིགས་>>དེབ་ཕྲེང་གསུམ་གཙོས་གསུང་འབུམ་དང་ལོ་དེབ།དེ་བཞིན་དཔྱད་དེབ་དང་སྙན་དེབ་སོགས་སྤྱི་སྒེར་གྱི་དཔེ་དེབ་མང་པོ་ཞིག་ལ་རྩོམ་སྒྲིག་དང་ཞུ་དག་གི་ལས་ཀ་བྱས། བརྩམ་བོན་སྐོར། <<ཆབ་ནག་སྲིད་པ་རྒྱུད་ཀྱི་བོན་ལ་དཔྱད་པ་>>ཞེས་པའི་དཔྱད་རྩོམ་དེབ་གཅིག་དང་<<ཚོར་བའི་རླབས་>>ཞེས་པའི་སྙན་དེབ་གཅིག་བཏོན། གཞན་ཡང་དུས་དེབ་དང་དྲྭ་རྒྱ་ཚགས་ཤོག་ཁག་ལ་དཔྱད་རྩོམ་དང་སྙན་རྩོམ་བཅུ་ཕྲག་མང་པོ་སྤེལ་ཡོད་པ་བཅས་ཀྱི་ངོ་སྤྲོད་སྙིང་བསྡུས་སུ།