སྤྱི་འཐུས། 2025-2026

༼ཉག་ཕྲ་བའི་དུས་སྐབས་འདིའི་ནང་བློ་འགེལ་ཆོག་པའི་སྐབས་ ༡༨ པའི་དབུས་གཙང་སྤྱི་འཐུས་འོས་མི།༽ སྐུ་ཞབས་ཀུན་དགའ་ཚེ་རིང་ལགས་ནི་བོད་མི་རིགས་ཀྱི་དོན་དུ་ལྷག་བསམ་ཟོལ་མེད་ངང་སྤྱི་ཚོགས་ཞབས་འདེགས་ཞུ་ མཁན་གྱི་མི་སྣ་ཞིག་ཡིན། དེ་ཡང་ཁོང་ནི་སྐུ་ན་གཞོན་དུས་ནས་སྤྱི་ཚོགས་ཀྱི་ལས་འགན་་དུ་མ་བསྒྲུབས་མྱོང་ཡོད། ཁོང་ནི་ དཔའ་ངར་ལྡན་པའི་ན་གཞོན་འགོ་ཁྲིད་ཅིག་ཡིན་པའི་ཆ་ནས། དྲང་བདེན་ཐོག་སྒེར་སེམས་སྤང་ནས་སྲི་ཞུ་བསྒྲུབ་པ་དང་། ྋགོང་ས་མཆོག་ལ་བློ་གཅིག་སེམས་གཅིག་གི་དད་པ་བརྟན་པོ་ཡོད་པ་ཀུན་གྱིས་ཤེས་གསལ་ཡིན། ཁོང་ནི་རང་ཁོངས་བོད་ཁྱིམ་དང་། ལྡི་ལི་གཙུག་ལག་སློབ་གྲྭ་ནས་སློབ་མཐར་ཕྱིན་པ་མ་ཟད། མི་མང་དང་འབྲེལ་ལམ་གནང་རྒྱུའི་ཁྱད་ཆོས་ཡོད་མཁན་གྱི་གང་ཟག་ཞིག་ཡིན། ཁོང་ནི་ཉམས་མྱོང་གིས་ཕྱུག་ཅིང་། རྒྱུན་དུ་ནས་མི་མང་གི་ལས་དོན་གང་ཡིན་ལ་འགན་འཁུར་གྱི་ཆོད་སེམས་བརྟན་པོ་ཡོད། སྐུ་ཞབས་ཀུན་དགའ་ཚེ་རིང་ལགས་་ནི་ ༢༠༡༩ ནས་ ༢༠༢༢ བར་བཞུགས་སྒར་རྡ་རམ་ས་ལའི་ས་གནས་འགོ་འཛིན་གྱི་ ཐུགས་འགན་བཞེས་ཡོད། བརྒྱུད་རིམ་འདིའི་ཁྲོད་དུ་ཁོང་ནི་ཁ་ཞེ་གཉིས་མེད་ཡིན་པ་དང་། ལས་ལ་བརྩོན་པའི་འགོ་ཁྲིད་ བཟང་པོའི་ཡོན་ཏན་དང་ལྡན་པ་མངོན་སུམ་དུ་བསྟན་གནང་ཡོད། བོད་ཀྱི་གཏམ་དཔེར་“ཉིན་མོའི་མི་དང་མཚན་མོའི་ཁྱི་“ཟེར་བ་ལྟར་སྤྱི་ཚོགས་སྤྱི་དང་ལྷག་པར་དུ་དབུལ་པོ། ལོ་ན་འགྲེས་པ། ནད་པ། ཉམ་ཐག་རྣམས་ཀྱི་བདེ་སྡུག་ལ་དོ་འཁུར་ དམིགས་བསལ་གནང་མྱོང་ཡོད། མདོར་ན་ཁོང་གིས་གཞུང་མང་གཉིས་ཀྱི་བར་འཐུད་པའི་ཟམ་ཆེན་ལྟ་བུའི་ཕྱག་ལས་གནང་ཡོད། ཁོང་གིས་ད་དུང་ས་གནས་གཞུང་དང་ཡུལ་མི་ལྷན་དུ་འབྲེལ་བ་བཟང་པོ་བཙུགས་ཐུབ་ཀྱི་ཡོད་པ་དེས་ཁོང་ལ་སྤྱི་དམངས་གཉིས་ཀས་ཡིད་ཆེས་བརྟན་པོ་ཐོབ་ཡོད། དེ་བཞིན་དབུས་བོད་མིའི་སྒྲིག་འཛུགས་ཀྱི་གནད་ཡོད་མི་སྣ་དང་། རྒྱ་གར་གྲོས་ ཚོགས་གོང་འོག་གཉིས་ཀས་འཐུས་མི་དང་ལྷན་དུ་འབྲེལ་ལམ་ཇེ་ཟབ་ཀྱི་ཚོགས་འདུ་བསྐོང་རྒྱུ་དང༌། བོད་པའི་རྩ་དོན་ཆེད་ཆ་རྐྱེན་མང་པོ་བསྐྲུན་ནས་བོད་དོན་དྲིལ་བསྒྲགས་དང་བདེན་མཐའ་གསལ་་བའི་ལས་གཞི་ཡང་མང་པོ་གནང་ཡོད། དེ་དང་མཉམ་དུ་ས་གནས་འགོ་འཛིན་ཟུར་པ་ཀུན་དགའ་ཚེ་རིང་ལགས་ནས་ཕྱི་ལོ་ ༢༠༡༩ ནས་ ༢༠༢༢ བར་དྷ་རམ་ས་ ལ་ས་གནས་འོས་བསྡུ་ཚོགས་ཆུང་གི་ཚོགས་གཙོ་ཡང་གནང་སྟེ། འོས་བསྡུའི་ཁྲིམས་དང་སྒྲིག་གཞི་དང་དེའི་ལེགས་ཉེས་ གཉིས་ཀར་ཉམས་མྱོང་རྒྱ་ཆེན་བསགས་གནང༌། དེའི་ཉམས་མྱོང་གིས་ཁོང་ལ་བཅའ་ཁྲིམས་དང་འོས་བསྡུའི་སྒྲིག་གཞི་ཁག་ལ་བཅོས་བསྒྱུར་ལེགས་པོར་ཡོང་བའི་ཐོག་ནས། མ་འོངས་པར་འོས་བསྡུ་ཚགས་ཚུད་པོ་འགྲོ་ཐུབ་པ་དང་། མཐུན་ སྒྲིལ་དང་དམངས་གཙོའི་ལག་ལེན་སྲ་བརྟན་བྱ་ཐུབ་པའི་འོས་ཆོས་ཀྱང་ཚང་ཡོད། ཁོང་གི་གཟེངས་སུ་ཐོན་པའི་ཕུལ་བྱུང་གི་ཕྱག་ལས་ནི་ཏོག་དབྱིབས་གཉན་རིམས་བཅུ་དགུའི་ནད་ཡམས་སྐབས་སུ། ས་ གནས་འགོ་འཛིན་ཡིན་པའི་ཆ་ནས་རང་སྲོག་འཛེམ་མེད་ཀྱིས་མི་མང་གི་མདུན་དུ་ཐོན་ནས་རོགས་སྐྱོར་གནང་མཁན་ཐོག་ མའི་གྲས་རེད། དེར་བརྟེན་ཁོང་ལ་ས་གནས་གཞུང་གིས་རྒྱ་གར་མང་གཙོའི་དུས་ཆེན་ ༼ཟླ་ ༡ པོའི་ཚེས་ ༢༦ ༽ ཉིན་ མོར་གཟེངས་བསྟོད་ཕྱག་འཁྱེར་བསྩལ་གནང་བ་དང༌། བཀའ་ཤག་དང་སྤྱི་འཐུས་ལྷན་ཚོགས་གཉིས་ཀས་བསྔགས་བརྗོད་ ཐོབ་ཡོད། མདོར་བསྡུས་ན། ང་ཚོའི་སྤྱི་འཐུས་ལྷན་ཚོགས་ནང་འཛིན་སྐྱོང་དང། སྲིད་ཇུས། བོད་མིའི་སྒྲིག་འཛུགས་ཀྱི་ཁྲིམས་ལུགས་ལག་བསྟར་སོགས་ལ་གོ་རྟོགས་དང་ཉམས་མྱོང་ཡོད་མཁན་དང་། ང་ཚོའི་མི་མང་གི་ཉིན་རེའི་གནས་སྟངས་ལ་གོ་རྟོགས་ཡོད་མཁན་གྱི་འཐུས་མི་ཞིག་དགོས་ཀྱི་ཡོད་ན། ད་ལྟའི་ཆར་སྔར་དང་མི་འདྲ་བར། སྤྱི་འཐུས་འོས་མི་དེ་ང་ཚོར་རྒྱུས་མངའ་ཡོད་པ་ཞིག་དང་། ཡིད་ཆེས་རུང་བ། མི་མང་དང་འབྲེལ་བ་ཟབ་པོ་ཡོད་པ་དང། ༧གོང་ས་༧སྐྱབས་མགོན་ཆེན་པོ་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་གི་དགོངས་བཞེད་ལ་ཤར་བསྐྱོད་བྱ་ཐུབ་མཁན་ཞིག་དགོས་འདུག་པར་བརྟེན། ས་འགོ་ཟུར་པ་སྐུ་ཞབས་ཀུན་དགའ་ཚེ་རིང་ལགས་་ལ་འོས་ཆོས་འདི་དག་ཚང་ཡོད་མིན་ལ་ཐེ་ཚོམ་བྱ་མི་དགོས་པས། སྐབས་བཅོ་བརྒྱད་པའི་དབུས་གཙང་སྤྱི་འཐུས་འོས་མི་ཁོང་ལ་དབུས་གཙང་སེར་སྐྱ་མི་མང་ནས་ཐུགས་འཁུར་ཆེ་བཞེས་ཀྱིས་རྒྱབ་སྐྱོར་གང་ལེགས་གནང་སྐྱོང་ཡོང་བའི་འབོད་བསྐུལ་དུ། རྒྱུས་མངའ་ཅན་གྱི་རྒྱབ་སྐྱོར་པས་ཟླ་ཚེས་ལ་ཕུལ།