སྤྱི་འཐུས། 2025-2026

ཆུང་དུས་ཨ་ཁུའི་མདུན་ནས་བོད་ཡིག་འབྲི་ཀློག་སྦྱངས། གློ་སྒྲིག་འཛུགས་ཀྱི་དམིགས་བསལ་སློབ་གྲྭའི་ནང་བོད་ཡིག་གཙོས་པའི་སློབ་སྦྱོང་བྱས། ༡༩༧༥ ལོར་བྱམས་པ་གླིང་གཞིས་ཆགས་ཐོག་མར་ཆགས་སྐབས་ནས་ ༡༩༩༢ བར་བཟོ་གྲྭའི་རྩིས་དྲུང་དང་གཞིས་ཆགས་ལས་དྲུང་སོགས་ལས་འགན་སྣ་ཚོགས་ཞུས། ཕྱི་ལོ་ ༡༩༨༥ ནས་ལོ་དྲུག་རིང་ས་གནས་རང་བདེན་ཚོགས་ཆུང་སྐབས་གཉིས་པའི་ཚོགས་གཙོའི་ལས་འཁུར་ཞུས། ༡༩༩༤ ནས་ ༢༠༠༧ བར་ལོ་གསུམ་རེ་བཞིན་རྒྱས་འཛོམས་ཚོགས་འདུའི་ཐོག་ནས་འོས་འདེམས་ཀྱིས་སྐབས་ལྔའི་རིང་མུ་མཐུད་ལོ་བཅོ་ལྔ་གློ་སྒྲིག་འཛིན་སྐྱོང་སྤྱི་ཁྱབ་ཚོགས་ཆུང་ཡིག་ཚང་གི་དྲུང་ཆེའི་ལས་ཁུར་ཞུས། དེའི་རིང་ས་གནས་འོས་བསྡུ་འགན་འཛིན་ལས་ཚབ་ལོ་ལྔ་བྱས། ཕྱི་ལོ་ ༢༠༠༧ ཟླ་ ༡༠ ནས་གློ་སྒྲིག་གཞིས་ཁག་གསུམ་གྱི་མི་མང་གི་འོས་འདེམས་གནང་ནས་ལོ་གསུམ་དང་ཟླ་གསུམ་རིང་ས་གནས་འགོ་འཛིན་གྱི་འགན་འཁུར་ཞུས། སྐབས་དེར་ས་གནས་འོས་བསྡུའི་འགན་འཛིན་དང་ས་གནས་ཁྲིམས་ཞིབ་པ་གཅིག་ལྕོགས་ཡིན། ཕྱི་ལོ་ ༢༠༡༢ ལོ་ནས་ཕྱི་ལོ་ ༢༠༡༧ བར་ལོ་དྲུག་རིང་ཧི་མ་ལ་ཡ་ན་གཞོན་དང་བུད་མེད་ནུས་ཤུགས་གོང་སྤེལ་བསྟི་གནས་ཁང་སྤོག་ར་ལས་གཞིའི་འགན་འཛིན་བྱས། ཕྱི་ལོ་ ༢༠༡༣ ལོ་ནས་དབུ་མའི་ལམ་མི་མང་ལས་འགུལ་ཁང་གི་དབུས་རྒྱུན་ལས་ཐོག་ཡིན། ཕྱི་ལོ་ ༢༠༡༤ ནས་གློ་སྒྲིག་ས་གནས་འཐུས་ཚོགས་སྐབས་བརྒྱད་པ་དང་། བཅུ་པ། ད་ལྟ་སྐབས་བཅུ་གཅིག་པའི་ཚོགས་གཙོ་ལས་ཐོག སྐབས་ལྔ་པའི་གློ་སྒྲིག་བདེ་དོན་འགན་འཛིན་ལྷན་ཚོགས་ཀྱི་ཚོགས་མི་བཅས་བྱས། ཕྱི་ལོ་ ༢༠༡༨ ནས་ས་གནས་ཡུལ་མི་ནང་པ་རྣམས་ལ་ནང་ཆོས་སློབ་འཁྲིད་ཁང་ནང་ཆོས་ངོ་སྤྲོད་ཚོགས་པའི་དགེ་རྒན་དང་འཛིན་སྐྱོང་ལས་འགན་གཅིག་ལྕོགས་བྱེད་མུས། དབུས་གཙང་ས་གནས་འབྲེལ་མཐུད་པ། གཞི་རིམ་མི་མང་ལས་འགུལ་ཐོག་མར་མགོ་འཛུགས་སྐབས་ཕྱི་ལོ་ ༢༠༢༢ ཟླ་ ༡༡ ནང་ནས་སྐབས་དང་པོའི་ཚོགས་གཞོན་དང་། སྐབས་གཉིས་པའི་རྒྱུན་ལས། ད་ལྟ་སྐབས་གསུམ་པའི་ཚོགས་གཞོན་ཡིན་པ་བཅས།།