དབུས་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་གིས་བོད་མིའི་འདུས་སྡོད་ཁུལ་སྐོར་སྐྱོད་གནང་སྟེ་འོས་བསྡུའི་གོ་རྟོགས་སྤེལ་གནང་ཡོད་པ་རེད།

བཙན་བྱོལ་བོད་མིའི་ཕྱི་ལོ་ ༢༠༢༥་་་༢༦ ལོའི་འོས་བསྡུ་ཆེན་མོའི་ལས་རིམ་ཕྱི་ཟླ་ ༡༠ ཚེས་ ༧ ཉིན་ནས་དངོས་སུ་མགོ་འཛུགས་གནང་བའི་གསལ་བསྒྲགས་གནང་ཡོད་པ་ལྟར། འདི་ལོའི་ཕྱི་ཟླ་ ༡༠ ཚེས་ ༨ ནས་ཚེས་ ༣༠ བར་འོས་བསྡུའི་དེབ་སྐྱེལ་གནང་ཡོད་པ་རེད། ཕྱི་ལོ་ ༢༠༢༦ ལོའི་ཟླ་ ༢ ཚེས་ ༡ ཉིན་སྔོན་འགྲོ་དང་། ཕྱི་ཟླ་ ༤ ཚེས་ ༢༦ ཉིན་དངོས་གཞིའི་འོས་འཕེན་རྒྱུ་ཡིན་སྟབས། དབུས་འོས་བསྡུ་ལས་ཁང་གི་འོས་བསྡུའི་གོ་རྟོགས་སྤེལ་ཆེད་འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་ལགས་དང་། འགན་འཛིན་ལས་འཕར་ཚེ་རིང་གཡུ་སྒྲོན་ལགས། འགན་འཛིན་ལས་འཕར་སྣང་ས་ཆོས་སྒྲོན་ལགས་བཅས་རྒྱ་གར་ནང་དང་། ཨ་རི་དང་ཡུ་རོབ། ཨོ་གླིང་བཅས་ཀྱི་ནང་ཕྱི་ལོ་ ༢༠༢༥་་༢༠༢༦ ལོའི་བཙན་བྱོལ་བོད་མིའི་འོས་བསྡུ་ཆེན་མོའི་སྐོར་ལ་གོ་རྟོགས་སྤེལ་བའི་སྐོར་སྐྱོད་གནང་ཡོད་པ་རེད།

དེ་ཡང་འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་ལགས་ཀྱིས་ཕྱི་ཟླ་ ༡༡ ཚེས་ ༡༦ ཉིན་ནས་རྒྱ་གར་ལྷོ་ཕྱོགས་དང་བྱང་ཕྱོགས་ཀྱི་གཞིས་ཆགས་ཁག་ནང་འོས་བསྡུའི་གོ་རྟོགས་སྤེལ་བའི་སྐོར་སྐྱོད་གནང་ཡོད་པ་དང་། དེ་བཞིན་ཕྱི་ཟླ་ ༡༡ ཚེས་ ༢༢ ནས་ཨོ་གླིང་ནང་སྐོར་སྐྱོད་མགོ་འཛུགས་གནང་སྟེ། ས་གནས་ཁག་གི་མི་མང་འདུ་འཛོམས་ཐོག་བཙན་བྱོལ་བོད་མིའི་ལས་འགན་དང་། ཕྱི་ལོ་ ༢༠༢༥་་༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་། བོད་མི་མང་སྤྱི་འཐུས་སྐབས་ ༡༨ པའི་འོས་བསྡུ་ཆེན་མོ་དང་འབྲེལ་བའི་འོས་བསྡུའི་སྒྲིག་གཞི་དང༌། ལས་རིམ། རྩ་འཛིན་ལམ་སྟོན་ཁག་ངོ་སྤྲོད་ཀྱིས་མང་ཚོགས་ལ་གོ་རྟོགས་གཏམ་བཤད་དང་དྲི་བར་ལན་འདེབས་གནང་འདུག

དེ་བཞིན་འོས་བསྡུའི་འགན་འཛིན་ལས་འཕར་ཚེ་རིང་གཡུ་སྒྲོན་ལགས་ཀྱིས། ཕྱི་ཟླ་ ༡༡ ཚེས་ ༡༦ ནས་ ༢༧ བར་དུ་རྒྱ་གར་བྱང་ཤར་ཁུལ་དང་། བྱང་ཨ་རིའི་ནང་དུ་སྐོར་སྐྱོད་གནང་ཡོད་པ་དང་། འོས་བསྡུའི་འགན་འཛིན་ལས་འཕར་སྣང་ས་ཆོས་སྒྲོན་ལགས་ཀྱིས་ཕྱི་ཟླ་ ༡༡ ཚེས་ ༡༥ ནས་རྒྱ་གར་བྱང་ཕྱོགས་ཁུལ་དང་། ཡུ་རོབ་ནང་སྐོར་སྐྱོད་གནང་སྟེ་བཙན་བྱོལ་བོད་མིའི་དམངས་གཙོའི་འཕེལ་རིམ་དང་། འོས་བསྡུ་ཆེན་མོའི་ནང་བོད་མི་ཆ་ཤས་གང་མང་ལེན་དགོས་པའི་གལ་གནད་དང་། འོས་བསྡུའི་སྒྲིག་གཞིའི་དགོངས་དོན། འོས་འཕེན་པའི་མིང་གཞུང་དེབ་འགོད་བྱེད་ཕྱོགས། འོས་འཕེན་སྟངས་དང་གསང་རྒྱ། འོས་ཤོག་གྲངས་བཤེར་སྐབས་འོས་རྩིས་མེད་དུ་གཏོང་ཕྱོགས། འོས་བསྡུའི་ལས་དོན་ལ་འགལ་རྐྱེན་བྱེད་པོར་ཉེས་ཆད་སོགས་ཀྱི་སྐོར་གཏམ་བཤད་གནང་ཡོད་འདུག